កម្ពុជា បានបង្ហាញក្ដីបារម្ភយ៉ាងខ្លាំង ទោះបីជាបានខិតខំផ្សព្វផ្សាយ និងណែនាំអំពីការផ្លាស់ប្តូររបបអាហារ និងរបៀបរស់នៅយ៉ាងសកម្មក៏ដោយ ក៏អត្រានៃជំងឺមិនឆ្លងនៅតែបន្តកើនឡើងគួរឱ្យកត់សម្គាល់។ កត្តាចម្បងដែលរុញច្រានឱ្យស្ថានភាពនេះកាន់តែធ្ងន់ធ្ងរ គឺដោយសារការនិយមបរិភោគអាហារកែច្នៃ និងភេសជ្ជៈដែលមានកម្រិតជាតិផ្អែមហួសកម្រិត។

នេះបើតាមអត្ថន័យក្នុងកិច្ចពិភាក្សាការងាររវាង លោកជំទាវ ឡោក ខេង ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) កាលពី ថ្ងៃទី០៣ ខែមីនា ឆ្នាំ២០២៦ បើកកិច្ចពិភាក្សាការងារជាមួយសមាគមគ្រូពេទ្យឯកទេសជំងឺទឹកនោមផ្អែមនៃប្រទេសឥណ្ឌា ដែលដឹកនាំដោយលោកវេជ្ជបណ្ឌិត Gupta។

យោងតាមរបាយការណ៍រួមរវាងក្រសួងសុខាភិបាល និងអង្គការសុខភាពពិភពលោក (WHO) ប្រចាំកម្ពុជា ស្ថានភាពជំងឺមិនឆ្លង (NCDs) កំពុងស្ថិតក្នុងកម្រិតអាសន្ន៖ មូលហេតុចម្បងនៃមរណភាព៖ ជំងឺបេះដូង សរសៃឈាម មហារីក ផ្លូវដង្ហើមរ៉ាំរ៉ៃ និងទឹកនោមផ្អែម ជាឃាតករលាក់មុខដែលបង្កឱ្យមានមរណភាពប្រមាណ ៦៤% ទៅ ៦៧% នៃមរណភាពសរុបនៅកម្ពុជា។ ជារៀងរាល់ឆ្នាំ មានប្រជាពលរដ្ឋប្រមាណ ៦០,០០០ នាក់ (ឬប្រហែល ១៦៤ នាក់ក្នុងមួយថ្ងៃ) បានបាត់បង់ជីវិតដោយសារជំងឺទាំងនេះ ក្នុងនោះប្រមាណ ២០% នៃប្រជាជនកម្ពុជា ប្រឈមនឹងហានិភ័យស្លាប់មុនអាយុ ៧០ ឆ្នាំ ដោយសារជំងឺមិនឆ្លង។

ផ្អែកតាមការអង្កេត STEPS Survey កត្តាហានិភ័យសំខាន់ៗរួមមាន៖ ការប្រើប្រាស់គ្រឿងស្រវឹង និងបារីនៅតែមានកម្រិតខ្ពស់, ការបរិភោគប្រៃលើសកម្រិត (មធ្យមភាគ ១០ក្រាម/ថ្ងៃ ដែលលើសពីការណែនាំរបស់ WHO ទ្វេដង) និងកង្វះសកម្មភាពរាងកាយ ឬការហាត់ប្រាណ។

ដើម្បីឆ្លើយតបនឹងបញ្ហាប្រឈមនេះ គណៈកម្មការទី៨ នៃរដ្ឋសភា បានចុះយុទ្ធនាការយ៉ាងសកម្មនៅតាមបណ្តាខេត្ត រោងចក្រ សាលារៀន និងមណ្ឌលសុខភាព ក្រោមសារអប់រំដ៏មានឥទ្ធិពលគឺ៖ «អំបិលតិច ស្ករតិច និងខ្លាញ់តិច»។ កិច្ចខិតខំប្រឹងប្រែងនេះ គឺស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដែលផ្តល់អាទិភាពខ្ពស់លើការពង្រឹងវិស័យសុខាភិបាល និងការបង្ការជំងឺមិនឆ្លងឱ្យបានជាអតិបរមា។លោកជំទាវប្រធានគណៈកម្មការ ក៏បានស្នើឱ្យលោកវេជ្ជបណ្ឌិត Gupta ចែករំលែកនូវបទពិសោធន៍ជោគជ័យ និងផ្តល់មតិយោបល់បច្ចេកទេសលើការទប់ស្កាត់ជំងឺ។ បន្ថែមពីនេះ លោកជំទាវបានសំណូមពរឱ្យភាគីឥណ្ឌា ជួយបណ្តុះបណ្តាលជំនាញឯកទេស និងការប្រើប្រាស់ឧបករណ៍បរិក្ខារពេទ្យទំនើបៗដល់គ្រូពេទ្យកម្ពុជា ដើម្បីពង្រឹងសមត្ថភាពព្យាបាលឱ្យកាន់តែប្រសើរ។ជាការឆ្លើយតប លោកវេជ្ជបណ្ឌិត Gupta បានកោតសរសើរចំពោះភាពម្ចាស់ការ និងគំនិតផ្តួចផ្តើមដ៏ខ្ពង់ខ្ពស់របស់រដ្ឋសភាកម្ពុជា។ លោកបានគូសបញ្ជាក់ថា ជំងឺមិនឆ្លងមិនត្រឹមតែជាបញ្ហាសុខភាពបុគ្គលប៉ុណ្ណោះទេ ប៉ុន្តែវាគឺជាបន្ទុកសកលដែលបំផ្លាញធនធានមនុស្សយ៉ាងធ្ងន់ធ្ងរ។ លោកបានសង្កត់ធ្ងន់ថា៖ «យើងត្រូវផ្លាស់ប្តូរជាលក្ខណៈប្រព័ន្ធ តាំងពីការបង្កើតលំហសាធារណៈសម្រាប់ហាត់ប្រាណ រហូតដល់ការអប់រំឱ្យមានការយល់ដឹងស៊ីជម្រៅពីរបបអាហារ»ផងដែរ៕