រដ្ឋមន្ត្រីក្រសួងថាមពលរុស្ស៊ីបាននិយាយថា រុស្ស៊ីមានគម្រោងបញ្ជូននាវាទីពីរដែលដឹកប្រេងទៅកាន់ប្រទេសគុយបា ខណៈដែលតំបន់ការីប៊ីនកំពុងតស៊ូក្រោមការបិទផ្លូវដ៏ធ្ងន់ធ្ងររបស់សហរដ្ឋអាមេរិក។ រដ្ឋមន្ត្រីក្រសួងថាមពលរុស្ស៊ីលោក Sergei Tsivilev បាននិយាយកាលពីថ្ងៃព្រហស្បតិ៍ថា នាវាបន្ទាប់កំពុងត្រូវបានរៀបចំរួចរាល់ ហើយនឹងបញ្ចូនទៅកាន់ប្រទេសគុយបាដែលកំពុងត្រូវបានកាត់ផ្តាច់ និងការបិទផ្លូវទាំងស្រុង។

ការអត្ថាធិប្បាយរបស់លោក Sergei Tsivilev បានកើតឡើង ប៉ុន្មានថ្ងៃបន្ទាប់ពីកប៉ាល់ដឹកប្រេងដែលមានទង់ជាតិរុស្ស៊ីដែលដឹកប្រេងឆៅប្រហែល ៧៣០,០០០ បារ៉ែលបានចូលចតនៅស្ថានីយប្រេង Matanzas របស់ប្រទេសគុយបាកាលពីថ្ងៃអង្គារ ដែលជាការដឹកជញ្ជូនប្រេងដ៏សំខាន់លើកដំបូងទៅកាន់ប្រទេសគុយបាក្នុងរយៈពេលប្រហែលបីខែ។

រដ្ឋបាលរបស់ប្រធានាធិបតីអាម៉េរិកលោក Donald Trump បានដាក់ការបិទផ្លូវប្រេងឥន្ធនៈទៅកាន់ប្រទេសគុយបា ប៉ុន្តែបានផ្តល់ការលើកលែងដើម្បីអនុញ្ញាតឱ្យមានការដឹកជញ្ជូននៅសប្តាហ៍នេះសម្រាប់ហេតុផលមនុស្សធម៌។ ប្រទេសគុយបាបានស៊ូទ្រាំនឹងការដាច់ចរន្តអគ្គិសនីអស់រយៈពេលជាច្រើនសប្តាហ៍ ការកំណត់កម្រិតប្រេងឥន្ធនៈ និងកង្វះខាតស្បៀងអាហារចាប់តាំងពីរដ្ឋបាលលោក Trump បានគំរាមកំហែងដាក់ពន្ធលើប្រទេសណាមួយដែលលក់ ឬផ្គត់ផ្គង់ប្រេងដល់ប្រទេសនេះ៕