អ្នកនាំពាក្យក្រសួងការបរទេសចិន លោកស្រី ម៉ៅ នីង បានចាត់ទុកការចាប់បញ្ជូនខ្លួនជនជាតិចិនឈ្មោះ លី សុង (Li Xiong) ដែលត្រូវបានគេស្គាល់ជាម្ចាស់ក្រុមហ៊ុន Huione និងជាបក្ខពួករបស់លោក Chen Zhi ប្រធានក្រុមហ៊ុន Prince Group ពីកម្ពុជាទៅកាន់ប្រទេសចិន ថាជាលទ្ធផលនៃកិច្ចសហប្រតិបត្តិការអនុវត្តច្បាប់ជាមួយអាជ្ញាធរកម្ពុជា ដើម្បីបង្ក្រាបអំពើឆបោកតាមប្រព័ន្ធអនឡាញ និងល្បែងស៊ីសងខុសច្បាប់។

នៅក្នុងសន្និសីទសារព័ត៌មាន លោកស្រី ម៉ៅ នីង នៅថ្ងៃទី០១ មេសានេះ បានលើកឡើងថា៖«ការប្រយុទ្ធប្រឆាំងនឹងល្បែងស៊ីសងតាមអនឡាញ និងអំពើឆបោកតាមទូរគមនាគមន៍ គឺជាការទទួលខុសត្រូវរួមគ្នារបស់សហគមន៍អន្តរជាតិ។ កន្លងមក ប្រទេសចិនបានសហការយ៉ាងសកម្មជាមួយកម្ពុជា និងប្រទេសដទៃទៀត ដើម្បីបង្ក្រាបបទល្មើសឆបោក និងល្បែងស៊ីសងឆ្លងដែន ដែលកិច្ចខិតខំប្រឹងប្រែងទាំងនេះទទួលបានលទ្ធផលគួរឱ្យកត់សម្គាល់»។

លោកស្រីបានសង្កត់ធ្ងន់បន្ថែមថា រដ្ឋាភិបាលទីក្រុងប៉េកាំង នឹងបន្តធ្វើការយ៉ាងជិតស្និទ្ធជាមួយបណ្តាប្រទេសជិតខាង រួមទាំងកម្ពុជា ដើម្បីពង្រឹងកិច្ចសហប្រតិបត្តិការអនុវត្តច្បាប់ឱ្យកាន់តែខ្លាំងក្លាថែមទៀត ដើម្បីការពារសុវត្ថិភាព និងទ្រព្យសម្បត្តិរបស់ប្រជាជន ក៏ដូចជាការថែរក្សាសណ្តាប់ធ្នាប់នៃការផ្លាស់ប្តូរ និងកិច្ចសហប្រតិបត្តិការរវាងបណ្តាប្រទេសក្នុងតំបន់។

ក្រសួងសន្តិសុខសាធារណៈបានប្រកាសនៅថ្ងៃពុធថា លោក Li Xiong ដែលត្រូវបានសង្ស័យថាជាសមាជិកសំខាន់នៃក្រុមល្បែងស៊ីសង និងក្លែងបន្លំឆ្លងដែនដ៏សំខាន់មួយ ត្រូវបានបញ្ជូនត្រឡប់មកប្រទេសចិនវិញពីប្រទេសកម្ពុជា។

លោក Li ដែលជាអតីតប្រធានក្រុមហ៊ុន Huione Group ត្រូវបានចោទប្រកាន់ថាជាសមាជិកស្នូលនៃប្រតិបត្តិការឆបោក និងលាងលុយកខ្វក់តាមអ៊ីនធឺណិតរបស់អ្នកជំនួញចិន-កម្ពុជា Chen Zhi។ លោក Li ត្រូវបានសង្ស័យថាមានជាប់ពាក់ព័ន្ធនឹងបទល្មើសជាច្រើន រួមទាំងការបើកល្បែងស៊ីសង ការក្លែងបន្លំ ប្រតិបត្តិការអាជីវកម្មខុសច្បាប់ និងការលាក់បាំង និងក្លែងបន្លំប្រាក់ចំណូលពីឧក្រិដ្ឋកម្ម។

ក្រសួងសន្តិសុខសាធារណៈបានបន្ថែមថា សមាជិកដែលមានឥទ្ធិពលជាច្រើននៃក្រុមនេះត្រូវបានចាប់ខ្លួនរួចហើយ ហើយថាខ្លួននឹងបង្កើនកិច្ចខិតខំប្រឹងប្រែងដើម្បីតាមប្រមាញ់ និងនាំជនរត់គេចខ្លួនដែលនៅសេសសល់ទៅកាន់តុលាការ ខណៈប្រទេសចិនបានបញ្ជូនអ្នកជំនាញទៅកាន់ប្រទេសកម្ពុជាដើម្បីជួយក្នុងការស៊ើបអង្កេត ដែលនាំឱ្យមានការចាប់ខ្លួនលោក Li៕