នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយនៅក្នុងសន្និសីទសារព័ត៌មានដ៏លេចធ្លោមួយនៅទីក្រុងយេរូសាឡឹម ថ្ងៃព្រហស្បតិ៍ (ថ្ងៃទី១៩ ខែមីនា) ថា អ៊ីរ៉ង់ត្រូវបានបំផ្លាញដោយយុទ្ធនាការអាម៉េរិក-អ៊ីស្រាអែល ដែលកំពុងបន្ត ខណៈពេលដែលទទូចថា អ៊ីស្រាអែលបានធ្វើសកម្មភាពតែម្នាក់ឯងក្នុងការវាយប្រហាររបស់ខ្លួនលើកន្លែងផលិតឧស្ម័នសំខាន់មួយរបស់អ៊ីរ៉ង់។

ការអត្ថាធិប្បាយនេះកើតឡើងចំពេលមានវិបត្តិនៅមជ្ឈិមបូព៌ាកាន់តែធ្ងន់ធ្ងរ បន្ទាប់ពីអ៊ីស្រាអែលបានវាយប្រហារឧស្ម័នធម្មជាតិ South Pars របស់អ៊ីរ៉ង់ដែលជាផ្នែកមួយនៃប្រព័ន្ធវាលឧស្ម័នធំបំផុតរបស់ពិភពលោក ដែលនាំឲ្យអ៊ីរ៉ង់សងសឹកដោយមីស៊ីល និងយន្តហោះគ្មានមនុស្សបើកនៅទូទាំងឈូងសមុទ្រ និងជំរុញឱ្យតម្លៃថាមពលសកលកើនឡើងយ៉ាងខ្លាំង។ លោក Benjamin Netanyahu បាននិយាយថា បន្ទាប់ពីប្រតិបត្តិការផ្លូវអាកាសប្រហែល ២០ថ្ងៃ អ៊ីរ៉ង់បានបាត់បង់សមត្ថភាពសំខាន់ៗ ដោយសព្វថ្ងៃអ៊ីរ៉ង់គ្មានសមត្ថភាពក្នុងការបង្កើនជាតិអ៊ុយរ៉ាញ៉ូម និងគ្មានសមត្ថភាពក្នុងការផលិតមីស៊ីលផ្លោងទេ។ ការវាយប្រហាររបស់អ៊ីស្រាអែល និងសហរដ្ឋអាមេរិកបានកំទេចកន្លែងទាំងនោះ ហើយឥឡូវនេះកំពុងកំណត់គោលដៅមូលដ្ឋានឧស្សាហកម្មដែលធ្លាប់ផលិតអាវុធបែបនេះ។

លោក Netanyahu ក៏បានទទូចផងដែរថា អ៊ីស្រាអែលបានធ្វើសកម្មភាពតែម្នាក់ឯង ជាមួយនឹងការវាយប្រហារនៅថ្ងៃពុធលើវាលឧស្ម័ន South Pars របស់អ៊ីរ៉ង់ ដែលផ្គត់ផ្គង់ប្រហែល ៧០ ភាគរយនៃតម្រូវការក្នុងស្រុករបស់អ៊ីរ៉ង់។ លោក Trump បានលើកឡើងថា លោកមិនបានដឹងមុនអំពីការវាយឆ្មក់របស់អ៊ីស្រាអែលលើវាលឧស្ម័នរបស់អ៊ីរ៉ង់នោះទេ ប៉ុន្តែលោកបាននិយាយថា លោកបានប្រាប់លោក Netanyahu កុំឲ្យវាយប្រហារវាលឧស្ម័នអ៊ីរ៉ង់ម្តងទៀត៕