នៅថ្ងៃទី១៥ ខែមីនា ឆ្នាំ២០២៦ វេលាម៉ោង១៦និង៣០នាទី ករណីលួច (ប្រេងសាំង) មួយកើតឡើង ប្រព្រឹត្តដោយជនសង្ស័យម្នាក់ ឈ្មោះ ហៀក អុីហុង ភេទប្រុស អាយុ៣២ឆ្នាំ ទីលំនៅភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង (ជាបុគ្គលិកបើករថយន្តដឹកប្រេង)។

ក្រោយពីទទួលបណ្តឹងពីជនរងគ្រោះឈ្មោះ ឈឿត គឹមលាង ភេទស្រី អាយុ២២ឆ្នាំ រស់នៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង (តួនាទីផ្នែកគណនេយ្យ) បានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលត្រែង នៃអធិការដ្ឋាននគរបាលស្រុករតនមណ្ឌល ។ សមត្ថកិច្ចបានចុះធ្វើការស្រាវជ្រាវ រហូតដល់ថ្ងៃទី១៦ ខែមីនា ឆ្នាំ២០២៦ វេលាម៉ោង១៤និង១០នាទី ទើបឈានដល់ធ្វើការឃាត់ខ្លួនជនសង្ស័យម្នាក់ ឈ្មោះ ហៀក អុីហុង ភេទប្រុស អាយុ៣២ឆ្នាំ ទីលំនៅភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង (ជាបុគ្គលិកបើករថយន្តដឹកប្រេង) នាំយកមកសាកសួរនៅអធិការដ្ឋាននគរបាលស្រុករតនមណ្ឌល។

 ក្រោយពីបានសាកសួរជនសង្ស័យខាងលើ បានឆ្លើយសារភាពថា ខ្លួនពិតជាបានធ្វេីសកម្មភាពលួចយកប្រេងសាំងអស់ចំនួន ០៣កាដុងកន្លះស្មើនិង ១១៤លីត្រ ដែលជារបស់ជនរងគ្រោះ តំណាងអោយស្ថានីយ៍ប្រេងឥន្ធនៈ យីហោឈ្មោះ លឹម អ៊ូ ត្រែង នៅចំណុចកើតហេតុខាងលើ ពិតប្រាកដមែន។ សម្ភារៈបាត់បង់រួមមាន៖ ប្រេងសាំងចំនួន ៥០៥លីត្រ ។

ករណីនេះ ជនសង្ស័យខាងលើត្រូវបានកម្លាំងនគរបាលស្រុករតនមណ្ឌល សាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធី៕