ប្រធានាធិបតីបារាំង លោក Emmanuel Macron នៅថ្ងៃសុក្រ ទី១៣ ខែមីនាឆ្នាំ២០២៦ បានថ្កោលទោសការវាយប្រហារមួយនៅភាគខាងជើងប្រទេសអ៊ីរ៉ាក់ ដែលបានសម្លាប់មន្ត្រីបារាំងម្នាក់ និងរបួសទាហានជាច្រើននាក់នៅក្នុងតំបន់ Erbil។

ទាហានបារាំងចំនួន ៦នាក់ ដែលផ្តល់ការបណ្តុះបណ្តាលប្រឆាំងភេរវកម្មនៅក្នុងតំបន់នោះ បានរងរបួសនៅក្នុងការវាយប្រហារដោយយន្តហោះគ្មានមនុស្សបើក នេះបើយោងតាមកងទ័ពបារាំងបាននិយាយកាលពីថ្ងៃព្រហស្បតិ៍ ត្រឹមតែប៉ុន្មានម៉ោងបន្ទាប់ពីមូលដ្ឋានអ៊ីតាលីមួយក៏ត្រូវបានកំណត់គោលដៅនៅក្នុងតំបន់នោះផងដែរ។ នៅក្នុងការបង្ហោះមួយនៅលើ X លោក Macron បាននិយាយថា នាយសេនាធិការ Arnaud Frion បានស្លាប់ដើម្បីប្រទេសបារាំង ហើយទាហានរបស់យើងជាច្រើននាក់បានរងរបួសនៅក្នុងការវាយប្រហារនេះ។ លោកបានបន្ថែមថា ការវាយប្រហារនេះប្រឆាំងនឹងកងកម្លាំងរបស់យើង ដែលចូលរួមក្នុងការប្រយុទ្ធប្រឆាំងនឹងក្រុម Daesh (ISIS) ចាប់តាំងពីឆ្នាំ២០១៥គឺមិនអាចទទួលយកបានទេ។

ប្រទេសបារាំងកំពុងដាក់ពង្រាយនាវាចម្បាំងប្រហែលដប់គ្រឿង រួមទាំងក្រុមវាយប្រហារនាវាផ្ទុកយន្តហោះរបស់ខ្លួន ទៅកាន់សមុទ្រមេឌីទែរ៉ាណេ សមុទ្រក្រហម និងអាចជាច្រកសមុទ្រ Hormuz ដែលជាផ្នែកមួយនៃការគាំទ្រការពារដល់សម្ព័ន្ធមិត្តដែលរងការគំរាមកំហែងដោយជម្លោះនៅមជ្ឈិមបូព៌ា៕