ការវាយប្រហារតាមអាកាសរបស់អ៊ីស្រាអែលនៅកណ្តាលតំបន់ហ្គាហ្សាបានសម្លាប់អ្នកកាសែតប៉ាឡេស្ទីនចំនួន ០៣ នាក់នៅថ្ងៃទី ២១ ខែមករា ឆ្នាំ ២០២៦ ចំពេលមានការរំលោភលើបទឈប់បាញ់ដ៏ផុយស្រួយ។ ហេតុការណ៍នេះបានកើតឡើងនៅក្នុងតំបន់ Al-Zahra ភាគនិរតីនៃទីក្រុងហ្គាហ្សា ជាកន្លែងដែលជនរងគ្រោះត្រូវបានគេរាយការណ៍ថា កំពុងថតការចែកចាយជំនួយ។

ទីភ្នាក់ងារការពារជនស៊ីវិលរបស់ហ្គាហ្សា និងប្រព័ន្ធផ្សព្វផ្សាយបានបញ្ជាក់ពីការស្លាប់នេះ ដែលបង្ហាញពីការកើនឡើងយ៉ាងខ្លាំងចាប់តាំងពីបទឈប់បាញ់ដែលសម្របសម្រួលដោយសហរដ្ឋអាមេរិកបានចាប់ផ្តើមនៅក្នុងខែតុលា ឆ្នាំ ២០២៥។ អ្នកកាសែតដែលត្រូវបានសម្លាប់រួមមាន លោក Mohammed Salah Qashta, លោក Abdul Ra’ouf Shaath និង លោក Anas Ghneim។ សាក្សីដែលបានឃើញហេតុការណ៍បាននិយាយថា ក្រុមនេះបានប្រើដ្រូនដើម្បីថតរូបការចែកចាយជំនួយដោយគណៈកម្មាធិការសង្គ្រោះអេហ្ស៊ីបនៅតំបន់ហ្គាហ្សា ហើយរថយន្តរបស់ពួកគេត្រូវបានវាយប្រហារដោយយន្តហោះគ្មានមនុស្សបើករបស់អ៊ីស្រាអែល បណ្តាលឲ្យឆាបឆេះយ៉ាងសន្ធោសន្ធៅ។ ការវាយប្រហារនេះបានកើតឡើងប្រហែល ៥ គីឡូម៉ែត្រ (៣ ម៉ាយ) ពីទឹកដីដែលគ្រប់គ្រងដោយអ៊ីស្រាអែល ហើយរថយន្តនេះត្រូវបានគេដឹងថា ជាកម្មសិទ្ធិរបស់គណៈកម្មាធិការអេហ្ស៊ីប៕