ភាពតានតឹងនៅតាមបណ្តោយព្រំដែនកម្ពុជា និងថៃ បន្តរហូតដល់ជាង២០ថ្ងៃមកហើយ ខណៈប្រជាពលរដ្ឋភៀសសឹកកម្ពុជាកើនឡើងជាង៦០ម៉ឺននាក់។

ដោយចំនួនប្រជាពលរដ្ឋភៀសសឹកកើនឡើង លោកជំទាវបណ្ឌិតស្រ្តីទី១កម្ពុជា បានបណ្តុះគំនិតឲ្យមានការដាំដុះបន្លែ ផ្លែឈើហូបផ្លែនៅតាមទីតាំងជំរុំភៀសសឹក ដើម្បីធានាបាននូវសន្តិសុខស្បៀង ប្រមូលផលទុកជូនគ្រួសារកងទ័ព បងប្អូនភៀសសឹកសម្រាប់ផ្គត់ផ្គង់ប្រចាំថ្ងៃ ព្រោះមិនអាចដឹងថាសង្រ្គាមនេះនឹងបញ្ចប់នៅពេលណា ហើយស្បៀងពីសប្បុរសជន និងរដ្ឋាភិបាលក៏អាចមានចន្លោះផ្គត់ផ្គង់មិនទាន់ពេលពេលវេលាផងដែរ។

នៅក្នុងភូមិសាស្ត្រខេត្តសៀមរាប ខេត្តពោធិសាត់ ខេត្តបន្ទាយមានជ័យ ខេត្តបាត់ដំបង ប្រជាពលរដ្ឋភៀសសឹកកំពុងមមាញឹកក្នុងការបន្តដាំដុះបន្លែបន្ថែមទៀតលើផ្ទៃដីទំនេរដែលមានការណែនាំ និងរៀបចំពីអភិបាល​ខេត្តនីមួយៗ រួមទាំងការចុះពិនិត្យគាំទ្របន្ថែមដោយមន្ត្រីកសិកម្មផងដែរ។

បន្លែដែលងាយស្រួលដាំដុះ ផ្តល់ផលរហ័ស និងវិធីសាស្ត្រដាំដុះងាយៗសម្រាប់ប្រជាពលរដ្ឋភៀសសឹកមាន​ ត្រកួន ម្រះ ស្លឹកគ្រៃ ជីគ្រប់មុខ សាឡាដ ប៉េងបោះ ត្រប់ ជាដើម៕