នៅរសៀលថ្ងៃទី១៦ ខែធ្នូ ឆ្នាំ ២០២៥ ក្រុមកីឡាអេឡិចត្រូនិកនារី Mobile Arena របស់ប្រទេសថៃ ត្រូវបានប្រកាសដកចេញពីព្រឹត្តិការណ៍ SEA Games លើកទី ៣៣ បន្ទាប់ពីកីឡាការិនី Naphat Warasin ដែលគេស្គាល់ថា Tokyogurl ត្រូវបានគេរកឃើញថាបានបន្លំក្នុងការប្រកួតជាមួយវៀតណាម ដោយប្រើប្រាស់កម្មវិធីលេងជំនួសក្នុងអំឡុងពេលប្រកួត ។

ការសម្រេចចិត្តនេះបានកើតឡើងបន្ទាប់ពីមានភាពចម្រូងចម្រាសយ៉ាងខ្លាំងដែលពាក់ព័ន្ធនឹងអត្តពលិកថៃ Naphat Warasin បានលេងក្នុងការប្រកួតជាមួយវៀតណាម ដែលក្រុមរបស់នាងចាញ់ក្នុងលទ្ធផល ០-៣។ ក្នុងអំឡុងពេលនៃការប្រកួត Naphat បានលើកម្រាមដៃកណ្តាលទៅកាន់កាមេរ៉ា ដែលបង្កឱ្យមានប្រតិកម្មភ្លាមៗចំពោះស្មារតីកីឡាមិនល្អ។ គណៈកម្មាធិការបច្ចេកទេសកីឡាអេឡិចត្រូនិក SEA Games លើកទី ៣៣ បានដកសិទ្ធិនាងចេញពីការប្រកួតភ្លាមៗ។

សមាគមកីឡាអេឡិចត្រូនិកថៃបានប្រកាសជាផ្លូវការអំពីការដកក្រុមកីឡាការិនី Mobile Arena របស់ខ្លួនចេញពីការប្រកួតកីឡាស៊ីហ្គេមដែលកំពុងប្រព្រឹត្តទៅ។ សេចក្តីថ្លែងការណ៍នេះបានសរសេរថា សមាគមកីឡាអេឡិចត្រូនិកថៃគោរពច្បាប់ មិត្តភាព និងស្មារតីកីឡាទាំងអស់។ ទោះជាយ៉ាងណាក៏ដោយ ឧប្បត្តិហេតុធ្ងន់ធ្ងរមួយបានកើតឡើងហួសពីការគ្រប់គ្រងរបស់យើង។ សមាគមកីឡាអេឡិចត្រូនិកថៃបនបន្ថែមថា ក្នុងនាមជាប្រទេសម្ចាស់ផ្ទះ យើងមិនអាចអនុញ្ញាតឱ្យក្រុមនេះបន្តបានទេ៕