បន្ទាប់ពីកិច្ចព្រមព្រៀងឈប់បាញ់ដែលប្រធានាធិបតីអាមេរិក លោក ​Donald Trump សម្របសម្រួលបានបរាជ័យ លោក Trump បានប្រាប់ការជួបជុំមួយនៅរដ្ឋ Pennsylvania ថា លោកនឹង «ធ្វើការអំពាវនាវ» ដើម្បី «បញ្ឈប់សង្គ្រាម» រវាងថៃ និងកម្ពុជា។

ប្រធានាធិបតីអាមេរិក លោក Donald Trump បាននិយាយនៅថ្ងៃទី៩ ខែធ្នូនេះថា លោកនឹងធ្វើការហៅទូរស័ព្ទទាក់ទងនឹងអរិភាពដែលបានផ្ទុះឡើងឡើងវិញនៅតាមព្រំដែនថៃ-កម្ពុជា ជាកន្លែងដែលការប្រយុទ្ធគ្នាបានចាប់ផ្តើមឡើងវិញក្នុងរយៈពេលតិចជាងពីរខែ បន្ទាប់ពីបទឈប់បាញ់ដែលលោកសម្របសម្រួលរវាងប្រទេសទាំងពីរបានបរាជ័យ។

ដោយទទួលស្គាល់ថាការប៉ះទង្គិចគ្នាបានផ្ទុះឡើងម្តងទៀតនៅក្នុងតំបន់ព្រំដែនដែលមានជម្លោះនៅអាស៊ីអាគ្នេយ៍ លោក Trump បាននិយាយថា លោកនឹងចូលអន្តរាគមន៍ម្តងទៀតដើម្បីបន្ធូរបន្ថយភាពតានតឹង។ លោកបានប្រាប់ហ្វូងមនុស្សថា «កម្ពុជា-ថៃ ហើយបានចាប់ផ្តើមសង្គ្រាមនៅថ្ងៃនេះម្តងទៀត ហើយថ្ងៃស្អែកខ្ញុំនឹងត្រូវធ្វើការហៅទូរស័ព្ទ ហើយបញ្ឈប់សង្គ្រាមរវាងប្រទេសដ៏មានអំណាចពីរ គឺប្រទេសថៃ និងប្រទេសកម្ពុជា ពួកគេកំពុងបន្តធ្វើសង្គ្រាមម្តងទៀតហើយ»។

ថ្លែងនៅក្នុងពិធីជួបជុំមួយនៅរដ្ឋ Pennsylvania ប្រធានាធិបតីអាមេរិកបានបញ្ជាក់ជាថ្មីអំពីជំនាញបង្កើតសន្តិភាពសកលរបស់លោក ដោយប្រកាសថា «ក្នុងរយៈពេលដប់ខែ ខ្ញុំបានបញ្ចប់សង្គ្រាមចំនួនប្រាំបី» មុនពេលរាយបញ្ជីអរិភាពរវាងកូសូវ៉ូ និងស៊ែប៊ី ប៉ាគីស្ថាន និងឥណ្ឌា និងអ៊ីស្រាអែល និងអ៊ីរ៉ង់»៕