លោកនាយករដ្ឋមន្ត្រី អនុទីន ឆានវីរៈគុល នាយករដ្ឋមន្រ្តីថៃ បានថ្លែងទៅកាន់ប្រជាជាតិនៅក្នុងការផ្សាយតាមទូរទស្សន៍ពិសេសមួយ ដោយបញ្ជាក់ជាថ្មីនូវការប្តេជ្ញាចិត្តរបស់ប្រទេសថៃក្នុងការការពារអធិបតេយ្យភាពរបស់ខ្លួន និងធានាសុវត្ថិភាពរបស់ប្រជាពលរដ្ឋរបស់ខ្លួន ដោយសង្កត់ធ្ងន់ថា ប្រទេសថៃមិនមែនជាអ្នកឈ្លានពានទេ ហើយនឹងប្រើប្រាស់កម្លាំងយោធាតែនៅពេលដែលចាំបាច់ដើម្បីការពារបូរណភាពទឹកដី។

លោកនាយករដ្ឋមន្ត្រី អនុទីន បានជំរុញឱ្យប្រជាពលរដ្ឋពឹងផ្អែកតែលើបណ្តាញផ្លូវការរបស់រដ្ឋាភិបាលសម្រាប់ព័ត៌មានថ្មីៗ ដើម្បីការពារព័ត៌មានមិនពិត ឬការភ័យស្លន់ស្លោ។ ក្រសួងការពារជាតិ និងក្រសួងការបរទេសថៃត្រូវបានកំណត់ជាប្រភពព័ត៌មានចម្បង ដោយធ្វើការសម្របសម្រួលជាមួយគ្រប់សាខាយោធា និងភ្នាក់ងារសន្តិសុខទាំងអស់ ដើម្បីផ្តល់ព័ត៌មានថ្មីៗត្រឹមត្រូវ និងស៊ីសង្វាក់គ្នា។

នាយករដ្ឋមន្ត្រីថៃរូបនេះបានសន្និដ្ឋានថា ខណៈពេលដែលប្រទេសថៃមិនស្វែងរកជម្លោះ ខ្លួននឹងមិនអត់ឱនចំពោះការរំលោភបំពានអធិបតេយ្យភាពរបស់ខ្លួនឡើយ ហើយនឹងធ្វើសកម្មភាពដោយប្រុងប្រយ័ត្ន។

គួរឲ្យដឹងដែរថា យោធាថៃបានបន្តផ្តើមធ្វើសកម្មភាពបង្កហេតុជាបន្តបន្ទាប់ដោយបានបាញ់ផ្សែងពុលចូលទីតាំងនៅតំបន់ភ្នំខ្មោចយ៉ាងច្រើន នៅតំបន់ប្រាសាទព្រះវិហារ។ យោធាថៃនៅបន្ដបាញ់ និងបន្ដបាញ់ផ្លោង បាញ់បុកយ៉ាងខ្លាំង មានយន្ដហោះយោធាថៃ បានហោះតាមបណ្ដោយព្រំដែន ប្រើយន្តហោះចម្បាំងប្រភេទ F-16 នៅឃុំស្រអែម ស្រុកជាំក្សាន្ត ខេត្តព្រះវិហារ ប្រើកាំភ្លើង១២,៧ រួមទាំងរថក្រោះបាញ់បុកបន្ថែម និងប្រើកាំភ្លើងត្បាល់ កាំភ្លើងធំ រថក្រោះបាញ់បុកជាពិសេសខ្លាំង នៅតំបន់អានសេះ និងទិសប្រាសាទព្រះវិហារ។

ការបើកធ្វើការបាញ់ប្រហាររបស់យោធាថៃលើកនេះ គឺក្រោយពីបានធ្វើសកម្មភាពបង្កហេតុ ជាច្រើនរាប់មិនអស់ច្រើនថ្ងៃមកហើយ ក្នុងចេតនាញុះញង់ជាមួយគ្នានេះ ខាងភាគីថៃបានបញ្ចេញនូវការផ្សព្វផ្សាយព័ត៌មានជាបន្តបន្ទាប់ ទាំងក្នុងបណ្តាញផ្លូវការ និងក្រៅផ្លូវការនូវព័ត៌មានមិនពិត ចោទប្រកាន់ មួលបង្កាច់មកលើកម្ពុជា ក្នុងចេតនាបំភ័ន្តសាធារណមតិជាតិ និងអន្តរជាតិ និងយកមកធ្វើជាលេស ដើម្បីបង្កឱ្យមានភាពតានតឹងផ្នែកយោធាជាមួយកម្ពុជាឡើងវិញ៕