ប្រទេសថៃបានបើកការវាយប្រហារតាមអាកាសប្រឆាំងនឹងប្រទេសកម្ពុជា ខណៈដែលរលកនៃការប្រយុទ្ធគ្នាថ្មីបានផ្ទុះឡើងរវាងប្រទេសជិតខាងអាស៊ីអាគ្នេយ៍ ដែលជាសញ្ញានៃការដួលរលំនៃផែនការសន្តិភាពដែលដឹកនាំដោយប្រធានាធិបតីអាមេរិក ដូណាល់ ត្រាំ កាលពីពីរខែមុន។ នេះបើតាមសារប័ត៌មាន​CNN។

ក្រសួងការពារជាតិកម្ពុជា នៅព្រឹកថ្ងៃទី៨ ខែធ្នូ ឆ្នាំ២០២៥ ចាប់ពីវេលាម៉ោងប្រមាណ ០៥:០៤នាទី យោធាថៃបានបើកការបាញ់ប្រហារមកលើកងកម្លាំងកម្ពុជា នៅក្នុងតំបន់អានសេះ ខេត្តព្រះវិហារ បន្ទាប់មកបាញ់នៅប្រាសាទតាមាន់ធំ ដោយប្រើប្រាស់រថក្រោះបាញ់ចូលជាច្រើន និងនៅតំបន់ប្រាសាទព្រះវិហារ នៅ៥មករា និងនៅចំការចេក និងការបើកការវាយប្រហារនេះធ្វើឡើងបន្ទាប់ពីយោធាថៃបានធ្វើសកម្មភាពបង្កហេតុជាច្រើនរាប់មិនអស់ច្រើនថ្ងៃមកហើយ ជាពិសេសឧបទវហេតុកាលពីម្សិលមិញនៅព្រលានថ្ម ក្នុងចេតនាញុះញង់ដើម្បីនាំដល់ការប៉ះទង្គិចគ្នា។

គួរឲ្យដឹងដែថា ប្រទេសថៃ និងកម្ពុជាបានប្រយុទ្ធគ្នាក្នុងជម្លោះព្រំដែនរយៈពេលប្រាំថ្ងៃក្នុងខែកក្កដា ដែលបានសម្លាប់មនុស្សរាប់សិបនាក់ និងបានធ្វើឱ្យមនុស្សប្រហែល ២០០ ០០០ នាក់ផ្លាស់ទីលំនៅនៅសងខាងនៃព្រំដែន។

បទឈប់បាញ់ដំបូងរវាងភាគីទាំងពីរត្រូវបានព្រមព្រៀងគ្នានៅថ្ងៃទី ២៨ ខែកក្កដា បន្ទាប់ពីលោក Trump បានជួបជាមួយមេដឹកនាំរៀងៗខ្លួន។ បន្ទាប់មកបានចុះហត្ថលេខាលើសេចក្តីប្រកាសបទឈប់បាញ់ដែល នៅទីក្រុងគូឡាឡាំពួរនៅចុងខែតុលា ក្នុងពិធីមួយដែលមានលោក Trump និងនាយករដ្ឋមន្ត្រីម៉ាឡេស៊ី Anwar Ibrahim ជាសាក្សី។

យ៉ាងណាមិញ ភាគីថៃនៅតែបន្តបើកការវាយប្រហារមកលើកម្ពុជា ទោះបានហត្ថលេខាលើសេចក្តីប្រកាសបទឈប់បាញ់ ខណៈកម្ពុជាប្តេជ្ញាចិត្តយ៉ាងម៉ឺងម៉ាត់ក្នុងការគោរពនិងអនុវត្តតាមលក្ខខណ្ឌនៃបទឈប់បាញ់ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ព្រមទាំងកិច្ចព្រមព្រៀងទាំងឡាយដែលភាគីទាំងពីរសម្រេចបានកន្លងមក ប្រកបដោយសុច្ឆន្ទៈ និងការទទួលខុសត្រូវខ្ពស់បំផុត៕