Met Gala 2025 បានប្រព្រឹត្តឡើងជាថ្មីម្តងទៀតនៅឯសារមន្ទីរ The Metropolitan Museum Of Art នាទីក្រុង New York សហរដ្ឋអាមេរិក ដែលជាព្រឹត្តិការណ៍ដ៏អស្ចារ្យប្រចាំឆ្នាំ ប្រមូលផ្តុំដោយតារាសម្តែង តារាចំរៀង អ្នកជំនួញ និងធុរជនល្បីៗបានអញ្ជើញមកចូលរួម និងបានរៀបចំច្នៃម៉ូតសម្លៀកបំពាក់ប្លែកៗតាមស្ទាយរៀងៗខ្លួនក្រោមប្រធានបទ "ការច្នៃម៉ូដសម្លៀកបំពាក់ពណ៌ខ្មៅ ឬ Tailoring Black Style"។ 

ជាក់ស្តែងក្នុងកម្មវិធី Met Gala 2025 កាលពីយប់ថ្ងៃទី៥ ខែឧសភានេះ មានការចូលរួមពីតារាល្បីៗមកពីបណ្តាប្រទេសនានាយ៉ាងច្រើនកុះករជាមួយការតុបតែងខ្លួនប្រកបដោយភាពច្នៃប្រឌិតខ្ពស់រៀងៗខ្លួន បើក្រលែកមើលម៉ូដសម្លៀកបំពាក់របស់តារាចម្រៀងនិងសម្តែងដ៏ល្បី Lisa ជាសមាជិកក្រុម BlackPink វិញទទួលបានការចាប់អារម្មណ៍ខ្លាំងនៅលើបណ្ដាញសង្គមខ្លាំងមែនទែន ដោយកញ្ញាជ្រើសរើសឈុតអាវធំដៃវែង Louis Vuitton មានឡេវពីរពណ៌ស អមមួយនឹងខោខ្លីពណ៌ខ្មៅ ស្លៀកពីលើស្រោមបា Louis Vuitton ពណ៌ខ្មៅជាមួយនឹងការតុបតែងម៉ូដសក់បួងឡើងលើ មើលទៅរញ៉េរញ៉ៃជាស្ទាយ៍ដ៏ស្រស់ស្អាតនិងទាក់ទាញ ស័ក្តិសមបំផុតជាមួយនឹងប្រធានបទក្នុងឆ្នាំនេះតែម្តង។ 

​​​សូមបញ្ជាក់ជូនថា Met Gala គឺជាព្រឹត្តិការណ៍ដ៏អស្ចារ្យមួយប្រារព្ធឡើងជារៀងរាល់ឆ្នាំដើម្បីរៃអង្គាសថវិកាសម្រាប់សារមន្ទីរ Metropolitan Museum of Art ក្នុងទីក្រុងញូវយ៉ក ព្រមទាំងរំលឹកពីវប្បធម៌ ប្រពៃណីដែលមានតាំងពីបុរាណកាលមក ជាក់ស្តែងក្រៅពីបង្ហាញម៉ូតសម្លៀកបំពាក់ពីតារាល្បីៗ អ្នកជំនួញ និងធុរជនល្បីៗប្រចាំប្រទេសនានា ក្នុងព្រឹត្តិការណ៍នេះក៏មានរៀបចំការតាំងពិព័រណ៍ម៉ូដសម្លៀកបំពាក់ គ្រឿងតុបតែងខ្លួន គំនូរ រូបថតសិល្បៈផ្សេងៗ និងសម្ភារដែលបានបន្សល់ទុកជាច្រើនទៀតពីសតវត្សទី១៨ ដល់សម័យទំនើបនាពេលបច្ចុប្បន្ននេះ ដើម្បីជាបង្ហាញជូនអ្នកចូលរួមឲ្យបានស្គាល់ និងស្វែងយល់ផងដែរ៕