ថ្នាក់ដឹកនាំកម្ពុជា ចិន ពិភាក្សាផ្លាស់ប្តូរទស្សនៈ និងយុទ្ធសាស្រ្តសំរាប់ពង្រឹងកិច្ចសហប្រតិបត្តិការរៀបចំកញ្ចប់ទស្សនកិច្ច និងជំរុញលំហូរភ្ញៀវទេចររវាងប្រទេសទាំងពីរ កម្ពុជា-ចិន ជាពិសេសប្រជាពលរដ្ឋពីតំបន់រដ្ឋបាលពិសេសហុងកុង តំបន់រដ្ឋបាលពិសេសម៉ាកាវ និងតំបន់ជុំវិញ។ នេះបើតាមអត្ថន័យនៃជំនួបពិភាក្សាការងាររវាង ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងលោក Wang Haimin ប្រធានក្រុមប្រឹក្សាភិបាលក្រុមហ៊ុន China Tourism Group Corporation Limited (CTG)។

តាមរយៈជំនួបពិភាក្សាកម្រិតខ្ពស់ និងប្រកបដោយផ្លែផ្កា កិច្ចសហប្រតិបត្តិការទេសចរណ៏ថ្មីៗ និងសំខាន់ៗ ត្រូវបានឯកភាពផ្តួចផ្តើមរួមមានការបង្កើតក្រុមការងារអនុវត្តអនុស្សរណៈនៃការយោគយល់គ្នាដែលបានចុះកន្លងមក ការរៀបចំជំនួបផ្គូរផ្គង និង FAMTrip ការនាំភ្ញៀវមកតាម Charter Flight នាឆ្នាំថ្មី២០២៥ ការបង្កើតពាក្យស្លោកសម្រាប់យុទ្ធនាការទេសចរណ៏រួមគ្នារវាងក្រសួងទេសចរណ៏និងក្រុមហ៊ុន ការជំរុញនិងផ្សព្វផ្សាយផលិតផលខ្មែរនៅផ្សារ China Duty Free Shop។ល។គួរបញ្ជាក់ផងដែរថា ក្រុមហ៊ុន China Tourism Group Corporation Limited (CTG) ត្រូវបានស្គាល់ថាជា China Travel Services (Holdings) Hong Kong Limited បង្កើតឡើងតាំងពីឆ្នាំ១៩២៣ មកម្ល៉េះដែលមានអាយុ១០១ឆ្នាំ មកទល់សព្វថ្ងៃនេះ គឺជាសហគ្រាសរដ្ឋរបស់ចិនដែលគ្រប់គ្រង និងចាត់ចែងផ្ទាល់ដោយគណៈកម្មការមជ្ឈឹមបក្ស មានទីស្នាក់ការកណ្តាលនៅទីក្រុងហុងកុងដោយគិតត្រឹមឆ្នាំ២០២៣ ក្រុមហ៊ុន CTG មានបុគ្គលិកជាង ៤៣,០០០នាក់ ទ្រព្យសម្បត្តិសរុបលើសពីប្រហែល 200 ពាន់លាន RMB និងមានបុត្រសម្ព័ន្ធរហូតដល់ជាង ៦០០ក្រុមហ៊ុន ដែលអាចបម្រើភ្ញៀវទេសចរជាង ៨០ លាននាក់ក្នុងមួយឆ្នាំផងដែរ៕