តារាចម្រៀងដ៏ល្បីឈ្មោះមិនចេះរីងស្ងួតក្នុងវិស័យ K-Pop គឺលោក G-Dragon បានមកបញ្ចេញក្បាច់រាំ និងបទថ្មីកំពុងផ្ទុះរបស់លោកគឺ Power ក៏ដូចជាស្ទាយ៌នៃការតុបតែងខ្លួនប្លែក ថ្មីគ្មានអ្នកដូច ដោយបានចូលរួមសម្ដែងក្នុងកម្មវិធី Mnet Asian Music Awards 2024 ឬ (MAMA 2024) ដែលជាការបង្ហាញខ្លួនលើកដំបូងរបស់លោកនៅក្នុងកម្មវិធីពានរង្វាន់ធំបំផុតរបស់ K-Pop ចាប់តាំងពីការសម្តែងលើកចុងក្រោយក្នុងឆ្នាំ ២០១៥ មក។ លោក G-D ឬ G-Dragon មកលើកនេះកាន់តែកក្រើកឆាក MAMA ជាមួយនឹងសមាជិក Big Bang ២នាក់ទៀត ដែលធ្វើឲ្យអ្នកទស្សនាមិនចង់ដកដង្ហើម ព្រោះសប្បាយនិងរំភើបពេក។

គួរបញ្ជាក់ដែរថាមុនពេលដែលកម្មវិធីដ៏ធំប្រចាំឆ្នាំនេះរៀបចំឡើង, ក្រុមហ៊ុន CJ ENM ក៏បានចេញប្រកាសនូវបញ្ជីឈ្មោះរបស់សិល្បករដែលត្រូវសម្តែងនៅកម្មវិធីពានរង្វាន់ MAMA ឆ្នាំ២០២៤ សម្រាប់ថ្ងៃទី២១ ខែវិច្ឆិកា នៅ Dolby Theatre ក្នុងទីក្រុង Los Angeles ដែរ អមដោយការសម្តែងនៅ Kyocera Dome ក្នុងទីក្រុង Osaka ប្រទេសជប៉ុន នៅថ្ងៃទី២២ និងទី២៣ ខែវិច្ឆិកា។ ក្នុងនោះរួមមាន ILLIT, Katseye, Riize, TWS និង J.Y. Park ត្រូវបានបញ្ជាក់ថានឹងទៅសម្តែងនៅសហរដ្ឋអាមេរិកនៅថ្ងៃទី២១ ខែវិច្ឆិកាខណៈ Enhypen, Tomorrow X Together, BoyNextDoor, Treasure, IVE, ME:I និង Plave នឹងឡើងឆាកសម្តែងនៅថ្ងៃទី២២ ខែវិច្ឆិកានៅ Kyocera Dome ហើយ aespa, INI, Zerobaseone, Lee Young-ji, Meovv, BiBi, (G)I-DLE G-Dragon ត្រូវសម្តែងនៅថ្ងៃទី២៣ ខែវិច្ឆិកា។

អ្វីដែលមិនធ្វើឲ្យអ្នកគាំទ្រទូទៅពិភពលោកមិនអាចបដិសេធបាននោះ គឺក្រោយខកខានក្នុងវិស័យសិល្បៈដ៏យូរ ចុងឆ្នាំ២០២៤នេះ G-D ត្រលប់មកវិញជាមួយនឹងស្ទាយ៌ថ្មីដូចរហស្សនាមជានាគកំណាចដដែល និងប្តូរពណ៌ស្ទាយ៌ថ្មីជាលើកទីមួយគឺពណ៌ផ្កាឈូក និងពណ៌ឆើតៗ ក្នុងកម្មវិធីប្រគល់ពានរង្វាន់ MAMA ប្រចាំឆ្នាំ២០២៤ បានធ្វើឡើងនៅសហរដ្ឌអាមេរិក។ ព្រឹត្តិការណ៍នេះក៏ត្រូវបានផ្សាយបន្តផ្ទាល់នៅលើប៉ុស្តិ៍ Mnet និងមាន Live ផ្ទាល់ផងដែរនៅលើឆានែលយូធូប Mnet K-pop និង Mnet TV ផងដែរ។ ទោះបីជាសមាជិកក្រុមរបស់ Big Bang មិនជុំគ្នាក្តី ប៉ុន្តែបទចំរៀងរបស់ក្រុមនេះកាលពី១០ឆ្នាំមុន នៅតែល្បីទូទាំងពិភពលោកដដែល ជាពិសេស outfit របស់លោក G-Dragon កំពុងតែកក្រើកខ្លាំងមិនថានៅខ្មែរ ឬពិភពលោកនោះទេដោយគេបានយកស្ទាយ៌បែបច្នៃប្រឌិតថ្មីៗរបស់តារាចំរៀងវ័យ៣០ក្រាស់រូបនេះ និងត្រូវបានគេហៅលោកថា នាគកំណាចនៅលើឆាក និងក្មេងតូចនៅក្រៅឆាកហើយបទ Power របស់ G-Dragon ទៀតសោតគឺបង្កប់នូវអត្ថន័យជាច្រើន ដែលលោកធ្លាប់ជួបប្រទះមុនពេលលោកផ្អាកពីសិល្បៈ៕