មហាជននិយមលេងបណ្តាញសង្គមហ្វេសប៊ុក ជាពិសេសអ្នកគាំទ្រវិស័យបវកញ្ញា ហាក់ស្រឡាំងកាំង និងភ្ញាក់ផ្អើលជាខ្លាំងក្រោយឃើញអ្នកគ្រប់គ្រងស្ថាប័ន Miss Grand ប្រចាំប្រទេសឥណ្ឌា ចេញលិខិតប្រកាសជាផ្លូវការបញ្ចប់ការរួមសហការគ្នាជាមួយនឹង Miss Grand International (MGI) បន្តទៀត។ 

តាមរយៈគណនីបណ្តាញសង្គម Instagram របស់ស្ថាប័ន Miss Grand India បានចេញសេចក្តីថ្លែងការណ៍ផ្លូវការមួយកាលពីពេលថ្មីៗនេះ បានឲ្យដឹងថា «ក្រោយពិចារណាយ៉ាងយកចិត្តទុកដាក់ ពួកយើងបានសម្រេចចែកផ្លូវលែងសហការជាមួយស្ថាប័ន Miss Grand International (MGI)បន្ត ទៀតហើយ។ ការសម្រេចចិត្តបែបនេះកើតចេញដោយការទទួលស្គាល់ថា ចក្ខុវិស័យ និងគោលដៅរបស់យើងគឺមានភាពខុសគ្នាដោយមិនឈរនៅលើមាគ៌ាតែមួយ។ ជំហានមួយនេះបានអនុញ្ញាតឱ្យយើងផ្ដោតលើការវិនិយោគ និងគម្រោងដ៏រីករាយមួយដែលកំពុងតែដំណើរការ ដោយយើងនឹងទម្លាយប្រាប់ឲ្យគ្រប់គ្នាបានដឹងក្នុងពេលឆាប់ៗនេះ។ ភាពស្មោះត្រង់នៅតែជាមូលដ្ឋានគ្រឹះនៃគុណតម្លៃរបស់យើង ហើយវាក៏ជះឥទ្ធិពលយ៉ាងខ្លាំងក្លាលើការសម្រេចចិត្តមួយនេះផងដែរ។ 

នៅក្នុងសេចក្តីថ្លែងការណ៍នោះបានបន្តទៀតថា៖ ពួកយើងមានមោទកភាពយ៉ាងខ្លាំង និងបានអបអរសាទរទៅកាន់បវកញ្ញា Rachel Gupta ដែលបាននាំមកុដមាសមកកាន់ប្រទេសឥណ្ឌាក្រោយឈ្នះការប្រកួត Miss Grand International 2024 នៅប្រទេសថៃ។ Rachel នៅតែជា queen របស់យើងជារៀងរហូត ហើយភាពជោគជ័យរបស់នាង បានចារទុកជាប្រវត្តិសាស្ត្រដ៏អស្ចារ្យសម្រាប់ប្រទេសយើងរួចមកហើយ។ ហើយយើងប្តេជ្ញាថានឹងឈរក្បែរនាង និងនៅតែបន្តគាំទ្រនាងអំឡុងពេលកាន់តំណែងនេះ។  ជាចុងបញ្ចប់ អ្នកគ្រប់គ្រងស្ថាប័ន Miss Grand ប្រចាំប្រទេសឥណ្ឌា ក៏បានបញ្ជាក់ជូនថា យើងនឹង ចែករំលែកព័ត៌មានថ្មីៗបន្ថែមទៀតក្នុងពេលឆាប់ៗនេះ។ អរគុណចំពោះការយោគយល់និងគាំទ្រ»៕