ខ្សែបម្រើការពារក្រុមជម្រើសជាតិអេស្ប៉ាញ របស់ក្លិបមេឃខៀវ Manchester City លោក Rodri បានក្លាយជាម្ចាស់ពានរង្វាន់កីឡាករបាល់ទាត់ឆ្នើម Ballon d’Or ប្រចាំឆ្នាំ២០២៤ ខណៈមានកីឡាការិនីបាល់ទាត់ឆ្នើមរបស់ក្លិប Barcelona និងជាសមាជិកអេស្ប៉ាញមួយរូបក៏ទទួលបានពានរង្វាន់នេះដែរ។  

មុនពេលក្លាយជាម្ចាស់ពានរង្វាន់កីឡាករបាល់ទាត់ឆ្នើម Ballon d’Or ប្រចាំឆ្នាំ២០២៤ ខ្សែបម្រើ Rodri ធ្លាប់ទទួលបានសមិទ្ធផលធំៗជាច្រើនកាលពីរដូវកាលមុនជាមួយក្លិបនិងជម្រើសជាតិ។ ពានរង្វាន់ធំបំផុតគឺខ្សែបម្រើរូបនេះជួយឲ្យក្លិប Manchester City ឈ្នះជើងឯកលីគកំពូលអង់គ្លេស Premier League 2023-2024 និងជួយក្រុមបាល់ទាត់ជម្រើសជាតិអេស្ប៉ាញ ឈ្នះជើងឯកទ្វីបអឺរ៉ុប UEFA European Championship ២០២៤ ព្រមទាំងឈ្នះពានរង្វាន់ផ្សេងៗទៀតដូចជា UEFA Super Cup 2023, FIFA Club World Cup 2023 ជាដើម។

ចំណែកឯម្ចាស់ពានរង្វាន់កីឡាការិនីបាល់ទាត់ឆ្នើម Ballon d’Or ប្រចាំឆ្នាំ២០២៤វិញ បានទៅលើកីឡាការិនី Aitana Bonmati របស់ក្លិប Barcelona និងជាសមាជិកក្រុមជម្រើសជាតិអេស្ប៉ាញ។ កីឡាការិនីរូបនេះបានជួយជម្រើសជាតិអេស្ប៉ាញ ឈ្នះជើងឯកអឺរ៉ុប UEFA Women’s Nations League 2023-2024។ ជាមួយគ្នាកីឡាការិនីរូបនេះបានជួយក្លិបឈ្នះជើងឯក Supercopa de España 2023-2024, ឈ្នះជើងឯក Copa de la Reina 2023-2024, ឈ្នះជើងឯក UEFA Women’s Champions League 2023-2024 និងឈ្នះជើងឯកលីគនារីអេស្ប៉ាញ 2023-2024 ផងដែរ៕