តារាថៃស្រី Janie Tienphosuwan ដែលជាតារាសម្ដែងមួយរូបដ៏មានឈ្មោះបោះសម្លេងប្រចាំប៉ុសិ៍លេខ ៣ថៃ ក្ដោបបានឱកាសតួឯកជាច្រើនសុទ្ធសឹងតែទទួលបានការគាំទ្រខ្លាំង ដោយមួយរយៈពេលចុងក្រោយនាងបានធ្វើឲ្យមហាជនពិសេសអ្នកគាំទ្រវិស័យតារាថៃមានការងើងឆ្ងល់សង្ស័យថានាងនិងស្វាមី លោក Mikey បានបែកបាក់គ្នាស្ងាត់ៗដោយសារតែឃើញតារាស្រីរូបនេះបង្ហោះតែរូបដំំណើរកម្សាន្តជាមួយកូនស្រី ប៉ុន្តែហាក់មិនឃើញមានរូបថតជាមួយស្វាមីឡើយ។

កន្លងទៅបានមួយរយៈធំ Janie ក៏ដាច់ចិត្តទម្លាយការពិតព្រមទទួលស្គាល់ថាចំណងស្នេហ៍រយៈពេលជាង ៦ឆ្នាំរបស់នាងបានបែកគ្នាជាមួយប្តីយូរហើយ តែដោយសារតែកន្លងមកនាងមិនចង់និយាយព្រោះខ្លាចប៉ះពាល់អារម្មណ៍កូនស្រីទើបទ្រាំលាក់បាំង ប៉ុន្ដែក្រដាស់មិនអាចខ្ចប់ភ្លើងជិតនោះទេ នាងក៏សុខចិត្តសារភាព និងបញ្ជាក់ទៀតថាត្បិតតែបែកបាក់គ្នាក៏ពិតមែនតែពួកគេទាំងពីរនៅតែដើរតួនាទីជាប៉ាម៉ាក់របស់កូនបានយ៉ាងល្អដដែល។

នេះបើយោងតាមបទសម្ភាសន៍របស់នាងក្នុងកម្មវិធី ឃុយសេប show ដែលមានការចោទជាសំនួរទៅនាងផងដែរថា ក្រោយបែកគ្នាមានអ្នកតាមញ៉ែខ្លះអត់? នាងតបថា បើថាអត់សោះតែម្តង តើមានបញ្ហាអ្វីទេ? ចូលមកដល់វ័យនេះជាវ័យដែលត្រូវប្រឹងប្រែងធ្វើការ ជាពិសេសមានកូនទៀត ធ្វើឲ្យនាងកាន់តែត្រូវគិតពីអនាគតកូនយ៉ាងល្អិតល្អន់ ពេលនេះកំពុង Enjoy ជិវិតនិងផ្ដោតលើធ្វើការ ហើយបើសួរថាអង្កាល់បានយក? គឺអាចនឹងនៅយូរទៀតផងដែរ៕ សម្រួលដោយ៖ Sun Darasy