ក្រុមហ៊ុនបច្ចេកវិទ្យាយក្ស Apple ទើបប្រកាស iPad Mini ថ្មីដែលជាបច្ចេកវិទ្យាជំនាន់ចុងក្រោយរបស់ខ្លួនដោយដំណើរការបន្ទះឈីប A17 Pro ដូចគ្នាទៅនឹងទូរស័ព្ទម៉ូឌែល iPhone 15 Pro និង iPhone 15 Pro Max កាលពីឆ្នាំមុន។ ចំពោះអតិថិជនទាំងអស់ក៏អាចបញ្ជាទិញពី Apple Store ដោយផ្ទាល់ចាប់ពីថ្ងៃទី២៣ ខែតុលា ឆ្នាំ២០២៤តទៅ។ នេះបើតាមការចេញផ្សាយដោយទីភ្នាក់ងារសារព័ត៌មាន GSM Arena នៅថ្ងៃទី១៧ ខែតុលា ឆ្នាំ២០២៤។

មូលហេតុដែល Apple បានបំពាក់បន្ទះឈីប A17 Pro ទៅលើ iPad Mini ថ្មីនេះដោយសារតែវាគាំទ្រ Apple Intelligence ដែលជាមុខងារបញ្ញាសិប្បនិមិត្ត AI ថ្មីរបស់ Apple ដែលនឹងចាប់ផ្តើមដំណើរការបន្តិចម្តងៗដល់អ្នកប្រើប្រាស់ក្នុងខែតុលានេះ។

គួរជម្រាបជូនថា iPad Mini របស់ក្រុមហ៊ុន Apple បានទាក់ទាញការគាំទ្រពីសំណាក់អ្នកប្រើប្រាស់ជាខ្លាំង ជាមួយអេក្រង់ទំហំ ៨.៣ អ៊ីញងាយស្រួលក្នុងការអានសៀវភៅ ឬកត់ត្រា។ iPad Mini គាំទ្រ Apple Pencil Pro ចុងក្រោយបង្អស់ ដែលត្រូវបានណែនាំជាមួយ iPad Pros កាលពីដើមឆ្នាំនេះ។ iPad Mini នេះនឹងដាក់លក់ក្នុងតម្លៃ ៤៩៩ដុល្លារ នៅទីផ្សារអាម៉េរិក ព្រមទាំងអាចបញ្ជាទិញបានដោយផ្ទាល់ចាប់ពីថ្ងៃទី២៣ ខែតុលាខាងមុខនេះផងដែរ៕