ក្រុមគោព្រៃកម្ពុជា បានយកឈ្នះក្រុមឆាយនីសតៃប៉ិ ក្នុងលទ្ធផល ៣ ទល់នឹង២ ក្នុងការប្រកួតមិត្តភាពអន្តរជាតិ នៅពហុកីឡដ្ឋានជាតិអូឡាំពិក នាយប់ថ្ងៃទី១១ ខែតុលា ឆ្នាំ២០២៤ ដែលនេះជាការយកបានជ័យជម្នះលើកទី១ ពីការដឹកនាំដោយគ្រូបង្វឹកបណ្តោះអាសន្នលោក Koji Gyotoku។

ក្នុងជំនួបមិត្តភាពអន្តរជាតិនេះ កីឡាករ មិន រតនៈ លេងបានយ៉ាងល្អដែលអាចរកគ្រាប់បាល់បាន ២គ្រាប់ ដោយការស៊ុតគ្រាប់បាល់តាមស្មើ និងមួយគ្រាប់ជ័យជម្នះ ហើយមួយគ្រាប់ទៀតអាចរកបានដោយមិត្តរួមក្រុម សៀង ចន្ធា ដែលនេះនាំឱ្យក្រុមកម្ពុជា នៅតែបន្តការយកបានជ័យជម្នះលើក្រុមឆាយនីសតៃប៉ិ ក្នុងប្រវត្តិជួបគ្នា ៤លើក ដោយមិនធ្លាប់ចាញ់ឡើយពោលមានតែស្មើគ្នា ១លើក។  

បន្ទាប់ពីទទួលបានជ័យជំនះនេះក្រុមគោព្រៃកម្ពុជា នឹងបន្តចេញទៅជួបមិត្តភាពជាមួយក្រុមហុងកុង នៅទីក្រុងហុងកុងនាថ្ងៃទី១៥ ខែតុលា ឆ្នាំ២០២៤ ខាងមុខនេះផងដែរ។

គួររម្លឹកដែរថា ប្រវត្តិជួបគ្នារវាងក្រុមគោព្រៃកម្ពុជា និងឆាយនីសតៃប៉ិ អំឡុងជំនួបមិត្តភាពអន្តរជាតិ ដោយកម្ពុជា បានយកឈ្នះឆាយនីសតៃប៉ិ ២ ទល់និង០ និងលេងពានប្រចាំទ្វីបអាស៊ី AFC Asian Cup ចំនួន ២លើកផ្សេងទៀត កម្ពុជាបានលេងស្មើលទ្ធផល ២ទល់និង២ និងឈ្នះ ២ទល់និង០។ ក្រុមទាំងពីរក៏ត្រូវបានបន្តជួបគ្នាលើកទី៤ ជាប្រវតិ្តសាស្រ្តនាយប់មិញនេះដោយកម្ពុជាអាចយកឈ្នះឆាយនីសតៃប៉ិក្នុងលទ្ធផល ៣ទល់នឹង២ផងដែរ៕