មហាជននិយមលេងបណ្តាញសង្គមកំពុងភ្ញាក់ផ្អើលជាខ្លាំងខណៈឃើញ ផលិតកម្មបារមី បានជូនដំណឹងមួយពាក់ព័ន្ធករណីមានជនអនាមិកបានក្លែងបន្លំជាតារាចម្រៀងរ៉េប​ វណ្ណដា តាមរយៈប្រព័ន្ធតេឡេក្រាម ក្នុងគោលបំណងបោកប្រាស់អ្នកគាំទ្រ និងដើម្បីលក់ប័ណ្ណសមាជិក និងកម្មវិធីជួបជុំផ្សេងៗណាមួយ។

តាមរយៈផេកផ្លូវការរបស់ផលិតកម្មបារមី កាលពីថ្ងៃទី ១១ ខែតុលា ឆ្នាំ ២០២៤ នេះបានជម្រាបថា «សេចក្តីជូនដំណឹង បារមី ប្រដាក់សិន ខមភេនី លីមីធីត សូមជម្រាបជូនសាធារណជន និង អ្នកគាំទ្រទាំងអស់ឱ្យបានជ្រាបថា នាពេលថ្មីៗនេះមានជនឆបោកបានបង្កើតគណនីក្លែងក្លាយ ក្រោមឈ្មោះរបស់តារាចម្រៀងហ៊ីបហប លោក វណ្ណដា (VannDa) លើប្រព័ន្ធ Telegram និងបានយករូបភាពរបស់ លោកទៅប្រើប្រាស់ក្នុងគោលបំណងបោកប្រាស់អ្នកគាំទ្រ និង ដើម្បីលក់នូវប័ណ្ណសមាជិក និងកម្មវិធីជួបជុំផ្សេងៗណាមួយ»។ទន្ទឹមនឹងនេះផលិតកម្មបារមី បានបញ្ជាក់ថា «លោក វណ្ណដា ពុំដែលធ្លាប់បានស្នើសុំ ឬបង្ហាញនូវព័ត៌មានហរិញ្ញវត្ថុផ្ទាល់ខ្លួនដែលពុំមានភាពច្បាស់លាស់ ក្នុងគោលបំណងបោកប្រាស់បែបនេះទេ។ ហើយលោក គឺជាសិល្បករនៅក្នុង​​ផលិតកម្ម បារមី ហើយការងារទាំងអស់ត្រូវឆ្លងកាត់ក្រុមហ៊ុនជាមុនសិន ហើយរាល់ព័ត៌មានទាក់ទងនឹងកម្មវិធីទាំងអស់ គឺចេញពីទំព័រផ្លូវការរបស់លោក វណ្ណដា និងបារមី ប៉ុណ្ណោះ ដូច្នេះហើយយើងសូមណែនាំកុំឱ្យ អ្នកគាំទ្ររបស់គាត់ផ្ញើថវិកា ឬព័ត៌មានផ្ទាល់ខ្លួនទៅកាន់គណនីបុគ្គលក្លែងបន្លំ និង បោកប្រាស់ដែលគួរឱ្យសង្ស័យ ដើម្បីចៀសវាងការខាតបង់ប្រាក់កាក់»៕