តារាសម្តែងប្រចាំប្រទេសថៃ អ្នកនាង Kob Suwanan (ផ្កាយព្រឹក) និងប្រជាពលរដ្ឋថៃរាប់ពាន់នាក់បានទៅចូលរួមអុជធូប និងដាក់កម្រងផ្កាចូលរួមគោរពវិញ្ញាណក្ខន្ធ មុននឹងពិធីបូជាសព នៅថ្ងៃទី៨ ខែតុលា ចូលមកដល់ ដោយម្នាក់ៗបានសម្តែងនូវអារម្មណ៍សោកស្តាយ និងសោកសង្រេងជាពន់ពេក ចំពោះសោកនាដកម្មឆេះរថយន្តក្រុងដឹកជញ្ជូនសិស្សដែលបានសម្លាប់គ្រូ និងសិស្សអស់ជាច្រើននាក់ នៅជាយក្រុងបាងកក កាលពីថ្ងៃទី១ ខែតុលា ឆ្នាំ២០២៤កន្លងទៅ។

តាមរយៈវីដេអូដែលបានបង្ហោះនៅលើបណ្តាញសង្គមកាលពីពេលថ្មីៗនេះបានបង្ហាញឲ្យដឹងថា នៅក្នុងពិធីបុណ្យសពនេះបានរៀបចំតាមប្រពៃណី អមដោយការតាំងលម្អផ្កាផ្ញីស្រស់ៗរាប់ម៉ឺនទង រួមនឹងការឧបត្ថម្ភមានទាំងនំចំណី និងទាំងភេសជ្ជៈសម្រាប់ចែកជូនដោយឥតគិតថ្លៃដល់ប្រជាពលរដ្ឋដែលបានទៅគោរពវិញ្ញាណក្ខន្ធ ក្រោមព្រះរាជឧបត្ថម្ភទាំងស្រុងរបស់ព្រះករុណា ព្រះមហាក្សត្រថៃ Maha Vajiralongkorn និងព្រះមហាក្សត្រី Suthida Tidjai ដើម្បីចូលរួមរំលែកទុក្ខចំពោះការបាត់បង់ធនធានដ៏មានតម្លៃ សម្រាប់ប្រទេសជាតិ ហើយនេះក៏ជារឿងដ៏សោកសៅបំផុតមួយក្នុងប្រវត្តិសាស្ត្រនៃប្រទេសថៃ។

គួររម្លឹកដែរថា ឧប្បត្តិហេតុឆាបឆេះរថយន្តក្រុងដឹកសិស្សចុះកម្មសិក្សា បានកើតឡើងកាលពីថ្ងៃទី១ ខែតុលា ឆ្នាំ២០២៤ កន្លងទៅ ដោយបានឆក់យកជីវិតគ្រូបង្រៀន និងកូនសិស្សតូចៗចំនួន ២៣នាក់ នៅលើផ្លូវ Vibhavadi Rangsit ក្នុងខេត្ត Pathum Thani ភាគកណ្តាលនៃប្រទេសថៃផងដែរ៕