អេស្ប៉ាញ ៖ គ្រួសាររបស់លោកយាយ បាននិយាយថា មនុស្សដែលមានចំណាស់ជាងគេបំផុត របស់ពិភពលោក គឺលោកយាយ Maria Branyas Morera ជនជាតិអេស្ប៉ាញ ដែលកើតនៅអាមេរិក និងឆ្លងកាត់សង្គ្រាមលោកលើកទី២ បានស្លាប់ កាលពីថ្ងៃអង្គារក្នុងអាយុ ១១៧ ឆ្នាំ យោងតាមការចេញផ្សាយ ពីគេហទំព័រ VN Express ។

Guinness World Records បានទទួលស្គាល់ជាផ្លូវការនូវឋានៈ របស់លោកយាយ Branyas ថា ជាបុគ្គល ដែលមានវ័យចំណាស់ជាងគេបំផុត របស់ពិភពលោក កាលខែមករា ឆ្នាំ ២០២៣ បន្ទាប់ពីមរណភាព របស់ដូនជីជនជាតិបារាំង Lucile Randon ក្នុងអាយុ ១១៨ ឆ្នាំ។

គ្រួសាររបស់លោកយាយ បានសរសេរនៅលើគណនី របស់នាងនៅលើបណ្តាញសង្គម X ថា លោកយាយ Maria Branyas បានចាកចេញពីពួកយើង។ លោកយាយបានស្លាប់ ដូចដែលលោកយាយមានន័យថា ការគេងរបស់លោកយាយវប្រកបដោយសន្តិភាព និងដោយគ្មានការឈឺចាប់ ។

លោកយាយ Branyas បានរស់នៅអស់រយៈពេល ២ ទសវត្សរ៍ចុងក្រោយនៅផ្ទះគិលានុបដ្ឋាយិកា Santa Maria del Tura នៅទីក្រុង Olot ក្នុងតំបន់ភាគឦសាននៃ Catalonia បានព្រមានលើការបង្ហោះកាលពីថ្ងៃចន្ទថា លោកយាយមានអារម្មណ៍ថា ខ្សោយហើយ។

លោកយាយបានបន្ថែមខ្លឹមសារនៅលើគណនីដែលគ្រប់គ្រង ដោយគ្រួសាររបស់លោកយាយថា ពេលវេលាជិតមកដល់ហើយ កុំយំ ខ្ញុំមិនចូលចិត្តទឹកភ្នែកទេ ហើយសំខាន់ជាងនេះទៅទៀត កុំរងទុក្ខសម្រាប់ខ្ញុំអី ខ្ញុំទៅណា ខ្ញុំនឹងសប្បាយចិត្ត ។

យោងតាមក្រុមស្រាវជ្រាវ Gerontology នៅអាមេរិក បានឲ្យដឹងថា បន្ទាប់ពីមរណភាព របស់លោកយាយ Branyas មនុស្សចាស់ជាងគេបំផុត នៅលើពិភពលោក គឺលោកយាយ Tomiko Itoka ជនជាតិជប៉ុន កើតនៅថ្ងៃទី ២៣ ខែឧសភា ឆ្នាំ ១៩០៨ និងមានអាយុ ១១៦ ឆ្នាំ ។

លោកយាយ Branyas បានឆ្លងកាត់ជំងឺគ្រុនផ្តាសាយ ឆ្នាំ ១៩១៨ សង្គ្រាមលោកលើកទី១ និងសង្គ្រាមលោកលើកទី ២ និងសង្រ្គាមស៊ីវិល របស់ប្រទេសអេស្ប៉ាញ បានឆ្លង Covid-19 ក្នុងឆ្នាំ ២០២០ ប៉ុន្មានសប្តាហ៍ បន្ទាប់ពីខួបកំណើត ១១៣ ឆ្នាំរបស់លោកយាយ ប៉ុន្តែបានជាសះស្បើយពេញលេញ ៕