កម្ពុជា-ចិន បានវាយតម្លៃខ្ពស់ អំពីកិច្ចសហប្រតិបត្តិការដែលមានកន្លងមក និងសន្យាលើកកម្ពស់កិច្ចសហប្រតិបត្តិការឲ្យកាន់តែល្អប្រសើរថែមទៀតក្នុងការប្រយុទ្ធប្រឆាំងអំពើពុករលួយរវាងប្រទេសទាំងពីរ ចិននិងកម្ពុជា។នេះបើតាមអត្ថន័យនៃជំនួបពិភាក្សាការងាររវាង ឯកឧត្តម ឱម យ៉ិនទៀង ប្រធានអង្គភាពប្រឆាំងអំពើពុករលួយ និងឯកឧត្តម Feng Zhili សមាជិកអចិន្រ្តៃយ៍ នៃគណបក្សកុម្មុយនិស្តចិន ខេត្តយូណាន លេខាគណៈអធិការវិន័យ នៃគណៈកម្មាធិការបក្សកុម្មុយនិស្តចិន ខេត្តយូណាន និងជាប្រធានគណៈត្រួតពិនិត្យកិច្ចការរដ្ឋចិន ខេត្តយូណាន ក្នុងឱកាសមកបំពេញទស្សនកិច្ចនៅកម្ពុជា។

ក្នុងជំនួបការងារនេះ ឯកឧត្តម ឱម យ៉ិនទៀង ក៏បានលើកឡើង អំពីការប្រយុទ្ធប្រឆាំងអំពើពុករលួយនៅកម្ពុជា ដែលផ្តោតលើការងារសំខាន់៣គឺ ទី១.ការងារអប់រំ ទី២.ការងារបង្ការទប់ស្កាត់ និងការបង្ក្រាប និងទី៣.កសាងសំណុំរឿង បញ្ជូនទៅតុលាការ ដែលជាសមត្ថកិច្ចផ្តាច់មុខរបស់ អ.ប.ព.។

ជាការឆ្លើយតប ឯកឧត្តម Feng Zhili ក៏បានលើកឡើងអំពីចំណងសាមគ្គីភាព មិត្តភាព កិច្ចសហប្រតិបត្តិការរវាង សាធារណរដ្ឋប្រជាមានិតចិន និងព្រះរាជាណាចក្រកម្ពុជា ដែលមានការរីកចម្រើនជាលំដាប់ ហើយមកទល់ពេលនេះបានឈានដល់ការកសាងសហគមន៍ជោគវាសនារួម និងកិច្ចសហប្រតិបត្តិការ «ត្បូងពេជ្រ»។ ហើយឯកឧត្តម ក៏បានបញ្ជាក់អំពីការងារប្រឆាំងអំពើពុករលួយនៅសាធារណរដ្ឋប្រជាមានិតចិន ដែលស្ថិតក្រោមការដឹកនាំរបស់ប្រធានាធិបតីលោក Xi Jingping បានប្រកាន់យកគោលការណ៍តឹងរឹងនៃការអនុវត្តច្បាប់ និងវិន័យជាពិសេសពាក់ព័ន្ធនឹងអំពើពុករលួយផងដែរ៕