គិតត្រឹមរយៈពេល៣ខែ ក្នុងឆ្នាំ២០២៤ កម្ពុជាបាននាំចេញទំនិញទៅកាន់ទីផ្សារប្រទេសវៀតណាមទទួលបានទឹកប្រាក់ជាង ១,៣ពាន់លានដុល្លារអាម៉េរិក កើនឡើង ៥៣ភាគរយបើធៀបនឹងរយៈពេលដូចគ្នាកាលពីឆ្នាំ២០២៣។

យោងតាមទិន្នន័យរបស់អគ្គនាយដ្ឋានគយ និងរដ្ឋាករកម្ពុជាបានឱ្យដឹងថាចាប់ពីខែមករា ដល់ខែមីនា ឆ្នាំ២០២៤ កម្ពុជាបាននាំចេញទំនិញទៅវៀតណាមសម្រេចបានទឹកប្រាក់ ១,៣ពាន់លានដុល្លារ កើនឡើង ៥៣ភាគរយ ខណៈការនាំចូលមានទឹកប្រាក់ចំនួន ៩៣៣លានដុល្លារធ្លាក់ចុះជាង ២ភាគរយ។ ប្រភពដដែលបានបញ្ជាក់ថាសម្រាប់ទំនិញដែលកម្ពុជានាំចេញ រួមមានសម្លៀកបំពាក់និងគ្រឿងបន្ទាប់បន្សំដែលធ្វើឡើងពីក្រណាត់, ​ម៉ាស៊ីននិងឧបករណ៍អគ្គិសនី​, កៅស៊ូ និងផលិតធ្វើអំពីកៅស៊ូ និងកសិផលមួយចំនួនទៀតជាដើម។ 

ជាមួយគ្នានេះដែរសម្រាប់ទំនិញនាំចូលរួមមាន រ៉ែប្រើជាគ្រឿងចំហេះ ប្រេងខនិជ និងផលិតផលពីការចម្រាញ់, ផលិតផលបានពីការចាក់ដោយម្ជុល, ម៉ាស៊ីន និងឧបករណ៍អគ្គិសនី និងបំណែកភាគរបស់វា, សម្ភារអគ្គិសនី, សរសៃអំបោះសិប្បនិម្មិតខ្លីៗ, យានក្រៅពីអយស្ម័យយាន និងសម្ភារមួយចំនួនទៀត។​ គួរបញ្ជាក់ដែរថា ក្នុងរយៈពេល ៣ខែនេះ សម្រាប់ការនាំចេញសរុបទៅកាន់ទីផ្សារអន្តរជាតិមានទឹកប្រាក់ចំនួន ៦,២ពាន់លានដុល្លារ កើនឡើង ១៨ភាគរយ ដោយក្នុងនោះសហរដ្ឋអាមេរិកមានតម្លៃជាង ១,៩ពាន់លានដុល្លារ កើន ៨.៩ភាគរយ, ចិនមានតម្លៃជាង ៣៦៦លានដុល្លារ កើនឡើង ១១.៤ភាគរយ, និងជប៉ុនមានតម្លៃជាង ៣៦៥លានដុល្លារកើនឡើង ១៨.៤ភាគរយ រួមនឹងទីផ្សារផ្សេងទៀត៕សម្រួលអត្ថបទដោយ៖ Puthseyha