ការស៊ើបអង្កេតរបស់អ៊ីស្រាអែល ជុំវិញការសម្លាប់បុគ្គលិកផ្ដល់ជំនួយ ៧នាក់ នៅក្នុងការវាយប្រហារតាមអាកាស នៅហ្កាហ្សា ក្នុងសប្តាហ៍នេះ បានរកឃើញពីការមានកំហុសយ៉ាងធ្ងន់ធ្ងរ និងការបំពាននីតិវិធីពីសំណាក់ពួកយោធា ដោយនេះជាលទ្ធផល ដែលនាំឲ្យមន្រ្តី ២នាក់ ត្រូវបានបណ្តេញចេញ ហើយមេបញ្ជាការជាន់ខ្ពស់ ត្រូវបានស្ដីបន្ទោសជាផ្លូវការ។

ការស៊ើបអង្កេតបានរកឃើញថា កងកម្លាំងអ៊ីស្រាអែលយល់ច្រឡំថា ពួកគេកំពុងវាយប្រហារខ្មាន់កាំភ្លើងរបស់ក្រុមហាម៉ាស នៅពេលដែលការវាយប្រហារដោយយានដ្រូន បានចំរថយន្តទាំង៣ របស់ក្រុមផ្ដល់ជំនួយរបស់អង្គការសម្បុរសធម៌ World Central Kitchen (ផ្ទះបាយកណ្ដាលពិភពលោក) ប៉ុន្តែនីតិវិធីស្តង់ដារនោះត្រូវបានរំលោភបំពាន។

នៅក្នុងសេចក្តីថ្លែងការណ៍មួយដែលបានចេញផ្សាយ នាថ្ងៃសុក្រ (ទី៥ ខែមេសា) នេះ យោធាបានឲ្យដឹង ថា៖ «ការវាយប្រហារលើរថយន្តផ្ដល់ជំនួយ គឺជាកំហុសធ្ងន់ធ្ងរ ដែលកើតចេញពីការបរាជ័យយ៉ាងធ្ងន់ធ្ងរដោយសារការកំណត់អត្តសញ្ញាណខុស កំហុសក្នុងការសម្រេចចិត្ត និងការវាយប្រហារផ្ទុយនឹងនីតិវិធីប្រតិបត្តិការស្តង់ដារ»។

យោធាបានបញ្ជាក់បន្ថែមថា ខ្លួនបានបណ្តេញនាយសេនាធិការកងពលតូចដែលមានឋានន្តរស័ក្តិវរសេនីយ៍ឯក និងជាមន្ត្រីជំនួយការពន្លត់អគ្គិភ័យកងពលតូចដែលមានឋានន្តរស័ក្តិថ្នាក់វរសេនីយ៍ត្រី ហើយបានចេញការស្តីបន្ទោសជាផ្លូវការដល់មន្ត្រីជាន់ខ្ពស់ ក្នុងនោះរួមទាំងឧត្តមសេនីយ៍នៅឯបញ្ជាការភាគខាងត្បូងផងដែរ។

គួរបញ្ជាក់ថា ការសម្លាប់បុគ្គលិកជំនួយ ៧នាក់ ដែលរួមមានពលរដ្ឋអង់គ្លេស អូស្ត្រាលី និងប៉ូឡូញ ពលរដ្ឋសញ្ជាតិ២ អាមេរិក-កាណាដា និងសហសេវិកប៉ាឡេស្ទីន បានបង្កឲ្យមានកំហឹងជាសកល នៅសប្តាហ៍នេះ៕

https://www.aljazeera.com/news/liveblog/2024/4/5/israels-war-on-gaza-live-biden-presses-israel-for-immediate-ceasefire