នៅថ្ងៃពុធ (ទី២៧ ខែមីនា) នេះ ការស្លាប់ ២ករណីត្រូវបានផ្សារភ្ជាប់ទៅនឹងក្ដីបារម្ភពីបញ្ហាសុខភាពដែលកំពុងកើនឡើងនៅក្នុងប្រទេសជប៉ុន ជុំវិញអាហារបំប៉នដែលត្រូវបានប្រើប្រាស់ក្នុងគោលបំណងបញ្ចុះកូឡេស្តេរ៉ុល ដោយមានមនុស្សជាង ១០០នាក់ត្រូវបានរាយការណ៍ថា កំពុងសម្រាកព្យាបាលនៅមន្ទីរពេទ្យ។

ក្រុមហ៊ុនផលិតថ្នាំ ដែលស្ថិតនៅចំកណ្តាលនៃក្តីបារម្ភនេះ គឺក្រុមហ៊ុនឱសថ Kobayashi Pharmaceutical បានប្រាប់សារព័ត៌មាន AFP ថា ខ្លួនដឹងពីការស្លាប់ ២ករណី ដែលប្រហែលជាជាប់ទាក់ទងទៅនឹងថ្នាំគ្រាប់ដែលគ្មានវេជ្ជបញ្ជារបស់ករ្រុមហ៊ុន។ ក្រុមហ៊ុនបានប្រមូលម៉ាកអាហារបំប៉ន ៣ប្រភេទ គឺ «Beni Koji Choleste Help» និងផលិតផល ២ផ្សេងទៀត ដែលមានសារធាតុផ្សំឈ្មោះ «Red Yeast Rice» (អង្ករដំបែក្រហម) ឬ «Beni Koji»។

ការស្រាវជ្រាវផ្នែកវេជ្ជសាស្ត្រពិពណ៌នាអំពីអង្ករដំបែក្រហមថា ជាជម្រើសជំនួសថ្នាំ Statin (ស្តាទីន) សម្រាប់ការបញ្ចុះកូឡេស្តេរ៉ុលកម្រិតខ្ពស់ ប៉ុន្តែក៏ព្រមានផងដែរពីហានិភ័យនៃការខូចខាតសរីរាង្គ អាស្រ័យលើសមាសធាតុគីមីរបស់វា។ ក្រុមហ៊ុនឱសថ Kobayashi Pharmaceutical កាលពីថ្ងៃអង្គារ បាននិយាយថា ខ្លួនបានដឹងពីការចូលមន្ទីរពេទ្យសរុបចំនួន ៧៥ករណី ទាក់ទងនឹងផលិតផលរបស់ខ្លួន ដែលខ្លួនបានប្រមូលមកវិញ បន្ទាប់ពីមានការត្អូញត្អែរឈឺតម្រងនោមពីអតិថិជន។

របាយការណ៍ប្រព័ន្ធផ្សព្វផ្សាយជប៉ុនជាច្រើនបានឲ្យដឹងថា ពេលនេះចំនួននេះ បានឡើងដល់ ១០៦ករណីហើយ ប៉ុន្តែទាំងក្រុមហ៊ុនផលិតថ្នាំ ឬក្រសួងសុខាភិបាល មិនអាចបញ្ជាក់ពីតួលេខចុងក្រោយនេះបានភ្លាមៗនោះទេ។

យ៉ាងណាក្ដី ក្រុមហ៊ុនបានព្រមានថា ខ្លួនមិនទាន់ឈានដល់ការសន្និដ្ឋានលើការផ្សារភ្ជាប់មូលហេតុ រវាងបញ្ហាសុខភាព និងអាហារបំប៉នរបស់ខ្លួន ដែលក្រុមហ៊ុនបានប្រមូលមកវិញ ដោយស្ម័គ្រចិត្ត កាលពីថ្ងៃសុក្រសប្ដាហ៍កន្លងមកនោះទេ។ ហើយក្រុមហ៊ុននៅទីក្រុង Osaka មួយនេះ ដែលលក់ថ្នាំ និងអាហារបំប៉នគ្មានវេជ្ជបញ្ជា បាននិយាយថា ខ្លួនក៏បានផ្គត់ផ្គង់ផងដែរនូវអង្ករដំបែក្រហមដល់ក្រុមហ៊ុនប្រមាណជា ៥០ផ្សេងទៀត នៅក្នុងប្រទេសជប៉ុន និងចំនួន២ នៅកោះតៃវ៉ាន់៕

https://www.japantimes.co.jp/news/2024/03/27/japan/science-health/two-fatal-cases-kobayashi-supplements/