ក្រសួងការបរទេសហ្វីលីពីន នៅថ្ងៃអង្គារ (ទី១២ ខែមីនា) បាននិយាយថា ខ្លួនបានទទួលសំណើទាក់ទងនឹងដែនសមុទ្រជាច្រើនពីប្រទេសចិន ប៉ុន្តែបានបន្ថែមថា ពួកគេមិនអាចពិចារណាបានទេ ព្រោះប្រឆាំងនឹងផលប្រយោជន៍ជាតិរបស់ប្រទេសអាស៊ីអាគ្នេយ៍មួយនេះ។

ក្រសួងការបរទេសបាននិយាយថា ក្នុងចំណោមសំណើរបស់ចិន មានការស្នើមួយដែលខ្លួន «ទទូចលើសកម្មភាពដែលនឹងត្រូវបានចាត់ទុកថា ជាការយល់ព្រម ឬការទទួលស្គាល់ដល់ការគ្រប់គ្រង និងរដ្ឋបាលរបស់ចិនលើតំបន់ថ្មប៉ប្រះទឹក Second Thomas Shoal ហើយថា ហ្វីលីពីនមិនអាចពិចារណាសំណើបែបនេះបានឡើយ។

ក្រសួងការបរទេស (DFA) កំពុងឆ្លើយតបទៅនឹងអត្ថបទរបស់សារព័ត៌មាន Manila Times ដែលដកស្រង់សម្ដី ពី «មន្ត្រីចិន» ដែលនិយាយក្នុងលក្ខខណ្ឌមិនបញ្ចេញឈ្មោះ ដោយលើកឡើងថា សំណើរបស់ទីក្រុងប៉េកាំងដើម្បីធ្វើឲ្យស្ថានភាពធម្មតាឡើងវិញ នៅតំបន់ជម្លោះ ក្នុងសមុទ្រចិនខាងត្បូង «ត្រូវបានបំពេញដោយភាពអសកម្ម» របស់រដ្ឋាភិបាលហ្វីលីពីន។

ក្រសួងបានឲ្យដឹងទៀតថា៖«តាំងពីដើមដំបូង DFA មានបំណងចង់គូសបញ្ជាក់ថា ហ្វីលីពីនកំពុងខិតជិតដល់ការចរចាសម្ងាត់ទាំងនេះដោយស្មោះត្រង់ និងទុកចិត្តបំផុត។ ដូច្នេះហើយ យើងមានការភ្ញាក់ផ្អើលចំពោះការបង្ហាញព័ត៌មានលម្អិតដ៏រសើបរបស់ប្រទេសចិនអំពីការពិភាក្សាទ្វេភាគីរបស់យើង»។

សារព័ត៌មាន Manila Times បានរាយការណ៍ដោយដកស្រង់សម្តីមន្ត្រីចិនថា ប្រទេសចិន បានបង្ហាញឯកសារគោលគំនិតចំនួន ១១ចំណុចដែលស្នើវិធីនានា ដើម្បីគ្រប់គ្រងតំបន់ថ្មប៉ប្រះ Second Thomas Shoal និងបញ្ហានេសាទនៅតំបន់ថ្មប៉ប្រះទឹកនេះ៕

https://www.reuters.com/world/asia-pacific/philippines-says-chinas-maritime-related-proposals-run-contrary-its-interests-2024-03-12/