រដ្ឋមន្ត្រីការបរទេសហ្វីលីពីន លោក Enrique Manalo នៅថ្ងៃចន្ទ (ទី ៤ ខែមីនា) នេះ បានប្រាប់សារព័ត៌មានថា ប្រទេសរបស់លោកចង់ដោះស្រាយជម្លោះដែនសមុទ្រជាមួយចិនដោយសន្តិវិធី ប៉ុន្តែបានផ្ញើសារសាមញ្ញមួយទៅកាន់ទីក្រុងប៉េកាំងថា «សូមឈប់រុកកួនពួកយើង»។

ថ្លែងនៅខាងក្រៅកិច្ចប្រជុំកំពូលអាស៊ាន-អូស្ត្រាលី នៅទីក្រុងមែលប៊ន លោក Manalo បានការពារគោលនយោបាយរបស់រដ្ឋាភិបាលរបស់លោក ក្នុងការផ្សព្វផ្សាយសមយុទ្ធរបស់ចិន នៅក្នុងដែនសមុទ្រ ដែលមានការប្រកួតប្រជែងគ្នា ក្នុងនោះរួមទាំងការឆ្លងកាត់នាពេលថ្មីៗនេះនៃនាវាចម្បាំងនៅជិតតំបន់ថ្មប៉ប្រះទឹក Scarborough Shoal ផងដែរ។

លោក Manalo បាននិយាយថា៖ «នេះគ្រាន់តែជាការព្យាយាមជូនដំណឹងដល់ប្រជាជនអំពីអ្វីដែលកំពុងកើតឡើង។ ហើយប្រទេសខ្លះ ឬយ៉ាងហោចណាស់ប្រទេសមួយ មានការលំបាកខ្លះៗជាមួយនឹងបញ្ហានោះ។ ប៉ុន្តែការពន្យល់ដ៏សាមញ្ញរបស់យើង គឺថា ប្រសិនបើអ្នកឈប់រុកកួនពួកយើង ហើយអាចធ្វើសកម្មភាពផ្សេងទៀត នោះនឹងមិនមានអ្វីដែលត្រូវរាយការណ៍ឡើយ»។

សូមបញ្ជាក់ថា ប្រទេសចិនទាមទារស្ទើរតែទាំងស្រុងថា សមុទ្រចិនខាងត្បូងជាទឹកដីរបស់ខ្លួន ដោយបានច្រានចោលការទាមទារពីប្រទេសមួយចំនួននៅអាស៊ីអាគ្នេយ៍ ក្នុងនោះរួមមានហ្វីលីពីន និងវៀតណាមផងដែរ។

រដ្ឋាភិបាលហ្វីលីពីនបានព្យាយាមប្រមូលផ្តុំការគាំទ្រអន្តរជាតិ និងក្នុងតំបន់ ចំពោះបុព្វហេតុរបស់ពួកគេ ដោយទទួលបានលទ្ធផលចម្រុះ។ លោក Manalo បាននិយាយថា «ហ្វីលីពីនប្តេជ្ញាដោះស្រាយវិវាទដោយសន្តិវិធី តាមរយៈមធ្យោបាយការទូត ឬមធ្យោបាយដោយសន្តិវិធី» ខណៈទទូចថា «ការណ៍នេះនឹងមិនធ្វើឡើង ដោយប៉ះពាល់ដល់ផលប្រយោជន៍របស់ជាតិយើងទេ»។ លោកបន្ថែមថា យើងកំពុងទាក់ទងដៃគូ នៅក្នុងបណ្ដាប្រទេសដែលមានគំនិតដូចគ្នា ជាមួយនឹងបញ្ហាស្រដៀងគ្នា និងការព្រួយបារម្ភស្រដៀងគ្នានេះ៕

https://timesofindia.indiatimes.com/world/rest-of-world/stop-harassing-us-philippines-foreign-minister-urges-china/articleshow/108193899.cms