យ៉ាងហោចណាស់ក៏មានមនុស្ស ៥០នាក់ដែរបានរងរបួស នៅថ្ងៃចន្ទ (ទី១០ ខែមីនា) នេះ ដែលភាគច្រើនស្ថិតក្នុងស្ថានភាពស្រាល បន្ទាប់ពីក្រុមហ៊ុនអាកាសចរណ៍ LATAM បានប្រាប់សារព័ត៌មាន New Zealand Herald របស់ប្រទេសនូវ៉ែលហ្សេឡង់ថា «បញ្ហាបច្ចេកទេស» បណ្តាលឲ្យយន្តហោះរបស់ខ្លួនមាន «ចលនាខ្លាំង» អំឡុងពេលហោះហើរពីទីក្រុង Sydney ប្រទេសអូស្ត្រាលី ទៅកាន់ទីក្រុង Aucklan ប្រទេសនូវ៉ែលហ្សេឡង់។

យោងតាមក្រុមហ៊ុន FlightAware បានឲ្យដឹងថា ជើងហោះហើរ LA800 របស់ក្រុមហ៊ុនអាកាសចរណ៍ LATAM តាមយន្តហោះ Boeing 787-9 Dreamliner បានចុះចតនៅអាកាសយានដ្ឋាន Auckland ដូចដែលបានគ្រោងទុក នៅរសៀលថ្ងៃចន្ទនេះ។ ជើងហោះហើរនេះជាធម្មតាឈប់នៅទីក្រុង Auckland ក្នុងដំណើរផ្លូវទៅកាន់ទីក្រុង Santiago ប្រទេសឈីលី។

ដោយមិនបានផ្តល់ព័ត៌មានអ្វីលម្អិតបន្ថែម អ្នកនាំពាក្យរបស់ក្រុមហ៊ុនអាកាសចរណ៍អាមេរិកខាងត្បូងមួយនេះ បានប្រាប់សារព័ត៌មាន Herald ថា មាន «បញ្ហាបច្ចេកទេស» ពេលហោះហើរដែលធ្វើឲ្យប៉ះពាល់ដល់អាកាសយានិក និងអ្នកដំណើរមួយចំនួន។

អ្នកនាំពាក្យម្នាក់បានប្រាប់សារព័ត៌មាន Reuters ថា រថយន្តសង្គ្រោះបន្ទាន់របស់អង្គការសប្បុរសធម៌ Hato Hone St John បានព្យាបាលមនុស្សប្រហែល ៥០នាក់ នៅព្រលានយន្តហោះ។ ពួកគេបានបន្ថែមថា អ្នករបួសម្នាក់ស្ថិតក្នុងស្ថានភាពធ្ងន់ធ្ងរ ហើយអ្នកផ្សេងទៀតរងរបួសពីស្រាលទៅមធ្យម៕

https://www.reuters.com/world/asia-pacific/24-injured-after-technical-problem-latam-sydney-auckland-flight-nz-herald-2024-03-11/