ប្រធានាធិបតីសហរដ្ឋអាមេរិកលោក Joe Biden បានហៅប្រធានាធិបតីរុស្ស៊ីលោក Vladimir Putin ថា ជា «អ្នកងប់ងុលនឹងគ្រាប់បែកនុយក្លេអ៊ែរ» ហើយបានរិះគន់លោក Donald Trump ដែលបានប្រដូចខ្លួនឯងទៅនឹងមេដឹកនាំប្រឆាំងរបស់រុស្ស៊ី គឺលោក Alexei Navalny ដែលទើបទទួលមរណភាពថ្មីៗនេះ។

នៅឯកម្មវិធីរៃអង្គាសថវិកា នៅទីក្រុង San Francisco កាលពីថ្ងៃពុធ (ទី២១ ខែកុម្ភៈ) លោក Biden បាននិយាយថា៖ «យើងមានអ្នកងប់ងុលនឹងគ្រាប់បែកនុយក្លេអ៊ែរ ដូចលោក Putin និងអ្នកផ្សេងទៀត ហើយយើងតែងព្រួយបារម្ភអំពីជម្លោះនុយក្លេអ៊ែរជានិច្ច»។

ដោយនិយាយសំដៅទៅបេក្ខជនឈានមុខគេរបស់គណបក្សសាធារណរដ្ឋ ដែលឈរឈ្មោះប្រជែងនឹងកិច្ចប្រឹងប្រែង ដើម្បីជាប់ឆ្នោតឡើងវិញនោះ លោក Biden បាននិយាយថា លោកមិនដឹងថា «សម្ដីអាក្រក់នេះចេញមកពីណានោះទេ» ដោយការលើកឡើងនេះសំដៅទៅលើការប្រៀបធៀបខ្លួនឯងរបស់លោក Trump ទៅនឹងលោក Navalny។

លោក Biden បាននិយាយថា៖ «វាធ្វើឲ្យខ្ញុំភ្ញាក់ផ្អើលណាស់នូវអ្វីដែលគេកំពុងនិយាយ។ ខ្ញុំចង់មានន័យថា ប្រសិនបើខ្ញុំបានឈរនៅទីនេះ កាលពី ១០ ឬ ១៥ឆ្នាំមុន ហើយបាននិយាយអ្វីទាំងអស់នេះ អ្នកគ្រប់គ្នានឹងគិតថា ខ្ញុំតាំងចិត្តនិយាយបែបនេះ»។

សូមបញ្ជាក់ថា លោក Biden កំពុងធ្វើដំណើររយៈពេល ៣ថ្ងៃនៅឆ្នេរខាងលិច ដោយក្នុងដំណើរនោះរួមបញ្ចូលទាំងការរៃអង្គាសថវិកា នៅភាគខាងត្បូង និងភាគខាងជើងនៃរដ្ឋ California ផងដែរ ពោលគឺជាព្រឹត្តិការណ៍ដែលនឹងបញ្ចូលទឹកប្រាក់បន្ថែមទៅក្នុងថវិកាចំនួន ១៣០លានដុល្លារអាមេរិក ដែលយុទ្ធនាការរបស់លោកប្រមូលបានកាលពីចុងខែមករា។

កាលថ្ងៃអង្គារ (ទី២០ ខែកុម្ភៈ) លោក Trump បានប្រៀបធៀបបញ្ហាផ្លូវច្បាប់របស់លោកទៅនឹងជោគវាសនារបស់លោក Navalny ដោយហៅការស្លាប់របស់មេដឹកនាំប្រឆាំងរុស្ស៊ីថា ជា «ស្ថានភាពដ៏សោកសៅបំផុត» ហើយអះអាងថា ការចោទប្រកាន់បទឧក្រិដ្ឋចំនួន ៤ករណីលើរូបលោក គឺពាក់ព័ន្ធនឹងនយោបាយ៕

ប្រភពពី៖ MTV Lebanon

https://www.mtv.com.lb/

អត្ថបទកែសម្រួលដោយ៖ ឈុន សុជាតា

https://www.mtv.com.lb/en/News/International/1426909/biden-calls-putin-a--crazy-sob--during-san-francisco-fundraiser