ដោយផ្អែកលើ ៤ ចំណុចនេះ អ្នកអាចវាយតម្លៃបុគ្គលិកលក្ខណៈរបស់អ្នកដែលអ្នកបានជួប ថាតើពួកគេមានចិត្តទូលាយ ឬចិត្តចង្អៀតចង្អល់។

១. រក្សាការសន្យាឬអត់?

បុគ្គលដែលរក្សាការសន្យារបស់ខ្លួន គឺជាមនុស្សដែលគួរឱ្យទុកចិត្ត។ ពេលគេបានសន្យាហើយ គេនឹងព្យាយាមរក្សាវាដល់ទីបញ្ចប់ គោរព និងធ្វើតាមសន្យានោះឱ្យទាល់តែបាន។ ទោះជាយ៉ាងណាក៏ដោយ ប្រសិនបើមនុស្សម្នាក់ជារឿយៗមិនអាចរក្សាការសន្យា ឬធ្វើតាមអំពើចិត្តដោយមិនធ្វើតាមការសន្យានោះ នោះគឺជាសញ្ញានៃមនុស្សដែលមិនមានទំនួលខុសត្រូវ។ មនុស្សល្អ និងចិត្តល្អ តែងតែរក្សាការសន្យា ចំណែកមនុស្សមិនស្មោះត្រង់ តែងតែនិយាយឱ្យតែរួចពីមាត់ គ្រាន់តែជាសន្យាខ្យល់តែប៉ុណ្ណោះ។

២. គិតអំពីអត្ថប្រយោជន៍

នៅពេលដែលមនុស្សប្រឈមមុខនឹងការសម្រេចចិត្ត ទាក់ទងនឹងផលប្រយោជន៍របស់ពួកគេ ពួកគេតែងតែបង្ហាញពីបុគ្គលិកលក្ខណៈពិតរបស់ពួកគេ។ នេះជាពេលវេលាដ៏ល្អក្នុងការទទួលស្គាល់ និងសម្គាល់បុគ្គលដែលអ្នកកំពុងទាក់ទងជាមួយ។ មនុស្សដែលគោរពតម្លៃសីលធម៌ និងស្រឡាញ់គ្រួសារ តែងតែធ្វើតាមមនសិការ ហើយមិនយកផលប្រយោជន៍ផ្ទាល់ខ្លួនជាមុនឡើយ។

ផ្ទុយទៅវិញ មនុស្សដែលគិតតែពីប្រយោជន៍ខ្លួន ហើយមិនអើពើនឹងមនសិការរបស់ខ្លួន គឺជាមនុស្សមិនគួរឱ្យទុកចិត្តឡើយ។ វាជាការល្អបំផុតក្នុងការចៀសវាងការសេពគប់ជាមួយមនុស្សដែលមិនគួរឱ្យទុកចិត្តទាំងនេះ ដើម្បីចៀសវាងការធ្លាក់ចូលទៅក្នុងជម្លោះ និងគ្រោះថ្នាក់ដាក់ខ្លួន។

៣. អាកប្បកិរិយាចំពោះអ្នកមានឋានៈទាប

ប្រសិនបើមនុស្សម្នាក់មិនអួតសម្ញែងពីឋានៈរបស់ខ្លួន ហើយមិនមើលងាយមនុស្សដែលមានឋានៈទាប នោះគឺជាសញ្ញានៃការរៀនសូត្រ និងគុណសម្បត្តិដ៏ថ្លៃថ្នូ។

មនុស្សតែងតែបង្កើតអារម្មណ៍នៃឧត្តមភាព នៅពេលប្រឈមមុខនឹងមនុស្សដែលមានឋានៈទាបជាង។ ទោះជាយ៉ាងណាក៏ដោយ ប្រសិនបើមនុស្សម្នាក់មានសមត្ថភាពផ្តល់តម្លៃដល់ភាពយុត្តិធម៌លើសអ្វីៗទាំងអស់ ហើយមិនដែលមើលងាយអ្នកដទៃដោយផ្អែកលើឋានៈសង្គម នោះបុគ្គលនោះបង្ហាញពីសេចក្តីសប្បុរស និងភាពជឿជាក់គួរឱ្យគោរព។

៤. អាកប្បកិរិយាចំពោះឪពុកម្តាយ

ជាញឹកញយ យើងទុកចំណាប់អារម្មណ៍ល្អក្នុងក្រសែភ្នែកអ្នកដទៃយ៉ាងងាយស្រួល ប៉ុន្តែជារឿយៗបង្ហាញអារម្មណ៍មិនល្អចំពោះមនុស្សជាទីស្រលាញ់របស់យើងក្នុងគ្រួសារ។

មនុស្សដែលអាចគ្រប់គ្រងអារម្មណ៍បានល្អ និងប្រព្រឹត្តចំពោះមនុស្សជាទីស្រឡាញ់ដោយសន្តិវិធី បង្ហាញពីការបណ្តុះនូវអាកប្បកិរិយាប្រកបដោយកិត្តិយស។ ផ្ទុយទៅវិញ មនុស្សដែលមានចិត្តចង្អៀត តែងតែងាយនឹងផ្ទុះឡើង ជាពិសេសជាមួយមនុស្សជិតស្និទ្ធ ដូចជាឪពុកម្តាយ មនុស្សដែលផ្តល់កំណើត និងចិញ្ចឹមពួកគេ៕