ក្រសួងព័ត៌មានបានស្វែងរកបេក្ខជនចំនួន២រូប បានបំពេញ​ការងារជាអ្នក​សារព័ត៌​មាន​នៅ​ក្នុងឆ្នាំ១៩៧០ ដែលស្ថិតនៅក្នុង​សម័យ​សង្គ្រាម ដែលពោរពេញទៅដោយគ្រោះថ្នាក់។ អ្នកកាសែតចំនួនពីររូបនេះ ត្រូវបានក្រសួងព័ត៌មានធ្វើការជ្រើសរើសជាបេក្ខជននៅក្នុងកម្មវិធីពានរង្វាន់​លើក​ទឹក​ចិត្តអ្នកសារព័ត៌មាន៥សម័យកាល ដែលត្រៀមរៀបចំប្រារព្ធពិធីនៅថ្ងៃទី២៤ ខែមីនា​ខាងមុខ​នេះ​។

លោក ព្រហ្ម សាយ ចាងហ្វាងកាសែតអរិយធម៌ខ្មែរ ដែលបច្ចុប្បន្នមានអាយុ៧៣ឆ្នាំ បានចាប់ផ្តើមប្រឡូក​ក្នុង​​អាជីព​សារព័ត៌មានតាំងពីឆ្នាំ១៩៦៧។

នៅដំបូងនៃការចាប់ផ្តើមអាជីពជាអ្នកសារព័ត៌មាន លោកបានបម្រើការងារក្នុងអង្គភាពសារព័ត៌មាន សុជីវ​ធម៌ របស់លោក នុត ឈឿម ពេលកំពុងរៀនត្រៀមប្រឡងបាក់ឌុប។​ លោក ព្រហ្ម សាយបានផ្លាស់ប្តូរការ​ងារ​ជាបន្តបន្ទាប់រហូតដល់ ឆ្នាំ១៩៩៥ លោកបានក្លាយទៅជាចាងហ្វាងកាសែតចក្រវាល និងបន្តមកកា​សែត​អរិយធម៌ រហូតដល់បច្ចុប្បន្ន។

លោកមានប្រសាសន៍ថា៖« ពេលត្រៀមប្រឡងបាក់ឌុប ខ្ញុំបានជួប លោក នុត ឈឿម នៅអង្គតា​សោម ខេត្តតាកែវ។ គាត់បានផ្តល់ឱកាសដល់ខ្ញុំឲ្យរៀនផងធ្វើការផង។ លោកក៏មានជំនក់ចិត្តប្រឡូកក្នុងអាជីព​មួយនេះរហូតមក»។

ឆ្លងកាត់បទពិសោធន៍ប្រមាណជាង៥៨ឆ្នាំកន្លងមក លោក ព្រហ្ម សាយធ្លាប់មានអត្ថបទលេចធ្លោជាច្រើន ដែលមានទាំងរឿងស៊ើបអង្កេត រឿងនយោបាយ និងរឿងវិភាគបែបរិះគន់ ដែលមានចាប់ពី៣ទៅ៤ទំព័រ។ ស្នាដៃដែលលោកនៅចងចាំ ដែលធ្វើឱ្យមានការទាក់ទាញនឹងកក្រើកដល់មហាជន និងរាជរដ្ឋាភិបាល​គឺមាន​ដូចជា រឿងដែលមានចំណងជើងថា «ឯកឧត្តម ឌុករ៉ាស៊ី គឺជារឿងរបស់ឌុក រ៉ាស៊ី ឯរឿងរបស់រាជរដ្ឋាភិបាល ឡុង រ៉េត គឺជារឿងរបស់រាជរដ្ឋាភិបាលឡុង បូរ៉េត»។

លោកអះអាថា៖«នៅអំឡុងទសវត្សរ៍១៩៧០ រដ្ឋគឺមានអំណាចខ្លាំង ទើបមិនអាចមានអ្នកណាប៉ះ​ពាល់​បាន។ អ្នកនិពន្ធចាងហ្វាងកាសែតមួយចំនួនក្នុងសម័យនោះត្រូវបានចាប់ដាក់គុកដូចជា ហែម វ៉ាន់រិទ្ធ ចាងហ្វាង​កា​សែតភ្នំពេញ លោក ប៉ អាស្នារិទ្ធ ចាងហ្វាងកាសែតបដិវត្តជាដើម ដូច្នេះសម័យ​បើអង្គភាព​នោះ​ខ្លាំង​ជ្រុល​គឺ​ប្រឈមនឹងការចាប់ដាក់គុកពីរដ្ឋអំណាចជាមិនខាន»។ 

ដោយឡែកលោក ជេត សន ដែលជានិពន្ធនាយកកាសែតភ្នំពេញថ្មី និងជាប្រធានរដ្ឋបាលក្លិបអ្នកកា​សែត​កម្ពុជានាពេលបច្ចុប្បន្ននេះ មានអាយុ៦៣ឆ្នាំ ចាប់ផ្តើមប្រឡូកក្នុងអាជីពសារព័ត៌​មាន​ចាប់តាំង​ពីឆ្នាំ​១៩៧៣។

លោកចាប់ផ្តើមអាជីពនេះ ក្រោមការជំរុញណែនាំពីឪពុកមា ដែលជាចាងហ្វាង​កាសែតសង្គ្រោះជាតិ នាសម័យសាធារណរដ្ឋខ្មែរ។

លោកបានចាប់ផ្តើមធ្វើជាអ្នកដំបូងគឺនៅអង្គភាពកាសែតសង្គ្រោះជាតិ» ត្រូវបានអាជ្ញាធរបិទក្រោយ​ដំណើរ​ការ៣ខែ ក្រោយមកបន្តធ្វើការជាមួយឪពុក​មា​ទៀតនៅ «សារព័ត៌មានសង្គ្រោះខ្មែរ»។

ប្រវត្តិនៃការផ្លាស់ប្តូរការងារក្នុងវិស័យសារព័ត៌មានគឺមិនខុសពីបេក្ខជនដទៃទៀតនោះទេ គឺលោកជេតសន

បានប្តូរការងារពីអង្គភាពមួយទៅអង្គភាពមួយទៀត។ រហូតមកដល់ឆ្នាំ២០១៣ លោកឈប់ទៅ​យកព័ត៌មាន​ផ្ទាល់ដោយសារវ័យកាន់តែចាស់ ប៉ុន្តែការងារជានិពន្ធនាយកកាសែតភ្នំពេញថ្មី។ហើយបច្ចុប្បន្ននេះ​លោកក៏ជា​ប្រធានរដ្ឋបាលក្លិបអ្នកកាសែតកម្ពុជាផងដែរ។

លោក ជេត សន កាលពេលនៅរៀន លោកចូលចិត្តតាមដានរឿងរ៉ាវនយោបាយ និងចង់បង្ហាញឲ្យមហាជន​ដឹងពីអំពើ​ពុករលួយ ការកៀបសង្កត់ ការកេងប្រវ័ញ្ចលើពលរដ្ឋពីសំណាក់ទាហាន លន់ នល់ ទើបលោកហ៊ាន​សរ​សេររិះគន់រដ្ឋាភិបាលក្នុងសម័យនោះ រហូតមានការគំរាមកំហែងពីបញ្ហាអសន្តិសុខផងដែរ។ 

លោកមានប្រសាសន៍ថា នាអំឡុងឆ្នាំ១៩៩៣ ប្រលោមលោកបែបរិះគន់រឿង «មន្តស្នេហ៍តាអ៊ំ រញ្ជួយព្រះរាជ​ដំណាក់» ក្នុងទំព័រភាសាក្អែកខ្មៅ ទទួលបានការគាំទ្រច្រើន រហូតដល់មានការស្នើឲ្យបោះពុម្ពកា​សែតបន្ថែម​ទៀត។ ជាប្រលោមលោកដែលនិយាយពីមនុស្សអសមត្ថភាព ប៉ុន្តែពូកែយកចិត្តថ្នាក់លើ ពូកែបកប្រែ និងជាន់​ពន្លិច​អ្នកដទៃដើម្បីខ្លួនឯង។ រឿង «អាមោកឡើងបុណ្យ» ក៏ទាក់ទាញការចាប់អារម្មណ៍​ច្រើនផងដែរ»។

ត្បិតបេក្ខជនជើងចាស់ទាំងពីររូបខាងលើនេះ ធ្លាប់ហែលឆ្លងចូលប្រឡូងការងារនៅក្នុងសម័យលំបាកមានការគៀបសង្កត់ដោយអំណាចរដ្ឋនៅក្នុងឆ្នាំ១៩៧០យ៉ាងណាក៏ដោយ ប៉ុន្តែពួកគាត់ធ្លាប់បានទទួលការបណ្តុះបណ្តាល លើអាជីពសារព័ត៌មាន និងបានចែក​រំលែកចំណេះដឹងទាំងអស់នេះ ទៅកាន់អ្នកជំនាន់ក្រោយដូចគ្នាដែរ។ ពិសេសស្នាដៃលេចធ្លោក និងការធ្វើឱ្យ​កក្រើក​នៅក្នុងសំណេរក្នុងជំនាន់នោះ គឺមានដូចគ្នាផងដែរ។

ដោយមើលឃើញពីការលំបាកនៅក្នុងអាជីពជាអ្នកនៅក្នុងអំឡុងពេល៧០យ៉ាងដូច្នេះ លោកព្រហ្ម សាយ និងលោក ជេត សន ចង់បានឱកាសធ្វើជាអ្នកកាសែតនៅជំនាន់នេះ។ ពួកគេអះអាងថា ដ្បិតប្រាក់ខែមិនសូវ​ទទួល​បាន​គ្រប់គ្រាន់ក៏ដោយ ប៉ុន្តែជំនាន់នេះ គឺមានគ្រប់យ៉ាង ឧបករណ៍ប្រើប្រាស់ជឿនលឿនថែមទៀត ដូច្នេះជំនាន់នេះ មិនសូវមានការភ័យខ្លាច ដូចជំនាន់សម័យធ្វើសង្រ្គាមឡើយ។

សូមបញ្ជាក់ថា នេះជាកម្មវិធីដ៏ធំបំផុត​ ក្នុងវិស័យសារព័ត៌មានដែលមិនធ្លាប់មានពីមុនមក និងដំបូងបង្អស់នៅប្រទេសកម្ពុជា។​ ដោយរដ្ឋមន្ត្រីក្រសួងព័ត៌មាន ឯកឧត្តម ខៀវ កញារិទ្ធ​ បានផ្តួចផ្តើមគំនិត និង​បានកំណត់​កាលបរិច្ឆេទ នៃកម្មវិធីពានរង្វាន់លើកទឹកចិត្តចំពោះអ្នកសារព័ត៌មាន៥សម័យកាល ចាប់​ពីទសវត្សរ៍ឆ្នាំ ១៩​៧០ ដល់​ឆ្នាំ២០១០​ ​ដែលកម្មវីធីនេះ​គ្រោងប្រារព្ធធ្វើ នៅថ្ងៃទី ២៤ ខែមីនា ឆ្នាំ២០២២ ​ខាងមុខនេះ ជាថ្ងៃប្រគល់ពានរង្វាន់លើកទឹកចិត្តចំពោះអ្នកសារព័ត៌មាន៥សម័យកាល។

គណៈកម្មការវាយតម្លៃស្តីពី “ពានរង្វាន់លើកទឹកចិត្តចំពោះអ្នកសារព័ត៌មាន ៥ សម័យកាល ចាប់ពីទសវត្សរ៍ឆ្នាំ ១៩៧០ រហូលដល់ឆ្នាំ២០១០” ត្រូវបានជ្រើសតាំងដោយ ក្រសួងព័ត៌មាននៅថ្ងៃទី២៦ ខែមករា ឆ្នាំ ២០​២២។ គណៈកម្មការ និងកំណត់បញ្ជីឈ្មោះបេក្ខភាពសម្រាប់វាយតម្លៃ ក៏ដូចជាគោលការណ៍លក្ខខណ្ឌនិង ផ្តល់ពិន្ទុសម្រាប់ជ្រើសរើសជ័យលាភីផ្អែកលើគុណវុឌ្ឍិការងារ ការបណ្តុះបណ្តាល និងបំពេញការងារកន្លង មក។

ពានរង្វាន់លើកទឹកចិត្តចំពោះអ្នកសារព័ត៌មាន ៥ សម័យកាល” ផ្តួចផ្តើមដោយក្រសួងព័ត៌មាន ក្រោមក្រោមកិច្ចសហការរៀបចំដោយសារព័ត៌មានត្នោត (TNAOT APP) ជាមួយសារព័ត៌មានអេឡិចត្រូនិចថ្មីៗ និងឧប​ត្ថម្ភធំដោយក្រុមហ៊ុន ស៊ីងហួយ ឌីវេឡុប ម៉ិន (ខេមឌា) ដែលមានបទពិសោធន៍សម្បូរបែបក្នុងការអភិវឌ្ឍអចលនទ្រព្យធំៗនៅប្រទេសកម្ពុជា ដូចជា STAR BAY នៅក្រុងព្រះសីហនុ STAR CITY នៅក្បែរអា​កាសយានដ្ឋានភ្នំពេញ និង TK-STAR នៅក្នុងតំបន់ទួលគោក ហើយក៏បានចូលរួមសហ ការឧបត្ថម្ភដោយមូលនិធីព្រីនស៍ ដែលជាមូលនិធិសប្បុរសធម៌ឈានមុខគេនៅកម្ពុជា ដែលបានបង្កើតឡើងក្នុងគោលដៅលើកកម្ពស់សុខមាលភាពនិងជីវភាពរស់នៅរបស់ប្រជាជនកម្ពុជា។

លើសពីនេះ ក៏មានការចូលរួមចំនែកក្នុងការឧបត្ថម្ភកម្មវិធីនេះអោយដំណើរការឡើងដោយក្រុមហ៊ុន GoodToGo ដឹកជញ្ជូនអាហារOnline, ក្រុមហ៊ុនធានារ៉ាប់រងអាយុជីវិត Titan Stone, ហើយនឹងក្រុមហ៊ុនមូលបត្រ ខេមបូឌា ស៊ីឃ្យូរីធី ផងដែរ៕

ជាមួយនឹងស្តង់ដារអន្តរជាតិ និងឧត្តមគតិ

ផ្តល់ផ្ទះដែលសក្តិសមសម្រាប់ធ្វើការវិនិយោគបំផុតដល់អ្នក

សហការ ឧបត្ថម្ភដោយ

ព័ត៌មានលម្អិតសូមផ្ញើចូលទៅកាន់ Link ខាងក្រោមនេះ

https://cja.tnaot.com/committee/​