ឯកឧត្តម អ៊ូក សោភ័ណ អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ តំណាងលោកជំទាវ ខៀវ សុផានី រដ្ឋលេខាធិការទទួលបន្ទុកការទូតសេដ្ឋកិច្ច បានដឹកនាំសិក្ខាកាមជាមន្រ្តីក្រសួងការបរទេសចំនួន ២៥រូប ដែលបានបញ្ចប់វគ្គបណ្តុះបណ្តាល "ការទូតសេដ្ឋកិច្ច" នៅវិទ្យាស្ថានជាតិការទូត និងទំនាក់ទំនងអន្តរជាតិ ទៅធ្វើទស្សនកិច្ចសិក្សានៅតំបន់សេដ្ឋកិច្ចពិសេសក្រុងព្រះសីហនុ និងកំពង់ផែស្វយ័តក្រុងព្រះសីហនុ។នៅក្នុងឱកាសនោះ សិក្ខាកាមជាមន្រ្តីក្រសួងការបរទេសចំនួន ២៥រូប ក៏បានចូលរួមស្តាប់ការធ្វើបទបង្ហាញអំពីការអភិវឌ្ឍខេត្តព្រះសីហនុ ដោយ លោក ឡុង ឌី ម៉ង់ អភិបាលរងខេត្តព្រះសីហនុ។

ដំណើរទស្សនកិច្ចសិក្សានេះ បានផ្តល់ឱកាសដល់សិក្ខាកាមបានយល់កាន់តែច្បាស់អំពីវិស័យអាទិភាព និងកាលានុវត្តភាពសម្រាប់ការវិនិយោគនៅកម្ពុជា ជាពិសេសនៅខេត្តព្រះសីហនុ និងដើម្បីឱ្យមន្រ្តីការទូតកម្ពុជាអាចអនុវត្តន៍ការងារការទូតសេដ្ឋកិច្ចសកម្ម និងប្រកបដោយប្រសិទ្ធភាពខ្ពស់ ស្របតាមយុទ្ធសាស្រ្តការទូតសេដ្ឋកិច្ចរបស់ក្រសួងការបរទេស និងសហប្រតិបត្តិការអន្តរជាតិផងដែរ៕