រដ្ឋមន្ត្រីការបរទេសហ្វីលីពីន លោក Enrique Manalo នៅថ្ងៃសុក្រ (ទី១២ ខែមេសា) នេះ បាននិយាយថា ប្រទេសរបស់ខ្លួនបានប្តេជ្ញាចិត្តក្នុងការការពារការអះអាងនូវសិទ្ធិអធិបតេយ្យភាពរបស់ខ្លួននៅក្នុងសមុទ្រចិនខាងត្បូង ខណៈដែលរដ្ឋមន្ត្រីការពារជាតិអាមេរិក លោក Lloyd Austin បានប្រាប់ថា ទីក្រុងវ៉ាស៊ីនតោនកំពុងស្ថិតក្នុងកិច្ចព្រមព្រៀងពេញលេញជាមួយទីក្រុងម៉ានីល ប្រឆាំងនឹងការគំរាមកំហែង។

រដ្ឋមន្ត្រីទាំង២ បាននិយាយនៅឯកិច្ចប្រជុំមួយ រវាងរដ្ឋមន្ត្រីការពារជាតិអាមេរិក និងហ្វីលីពីន ហើយនិងរដ្ឋមន្ត្រីការបរទេស និងទីប្រឹក្សាសន្តិសុខជាតិរបស់ប្រទេសទាំង២ ដោយជំនួបនេះ បានកើតឡើងមួយថ្ងៃបន្ទាប់ពីមេដឹកនាំសហរដ្ឋអាមេរិក ជប៉ុន និងហ្វីលីពីន បានជួបប្រជុំគ្នានៅសេតវិមាន ដើម្បីទប់ទល់ប្រឆាំងនឹងសម្ពាធដែលកំពុងកើនឡើងរបស់ទីក្រុងប៉េកាំងលើទីក្រុងម៉ានីល ក្នុងជម្លោះ នៅសមុទ្រចិនខាងត្បូង។

សូមបញ្ជាក់ថា កាលពីខែមុន ប្រទេសហ្វីលីពីន និងចិន មានការប៉ះទង្គិចគ្នានៅដែនសមុទ្រជាច្រើនដង ដោយក្នុងនោះរាប់បញ្ចូលទាំងការប្រើប្រាស់កាណុងបាញ់ទឹករបស់ចិន និងការប្រើពាក្យសម្ដីខ្លាំងៗដាក់គ្នាទៅវិញទៅមក ដែលបានបង្កឲ្យមានការព្រួយបារម្ភអំពីភាពតានតឹងកើនឡើង នៅដែនសមុទ្រនេះ។

ទីក្រុងប៉េកាំងទាមទារអធិបតេយ្យភាពលើសមុទ្រចិនខាងត្បូងស្ទើរតែទាំងមូល ដែលបានបង្កឲ្យមានកំហឹងពីប្រទេសជិតខាងមួយចំនួនដែលមានជម្លោះព្រំដែនសមុទ្រជាមួយ ដោយពួកគេបាននិយាយថា ការអះអាងនោះបានកាត់ចូលទៅក្នុងតំបន់សេដ្ឋកិច្ចផ្តាច់មុខរបស់ពួកគេ៕

https://www.independent.co.uk/asia/east-asia/biden-defend-philippines-south-china-sea-japan-b2527642.html