ក្រសួងការបរទេសរុស្ស៊ីកាលពីថ្ងៃចន្ទ បានថ្កោលទោសយ៉ាងខ្លាំងចំពោះការវាយប្រហាររបស់អ៊ីស្រាអែលទៅលើអគារស្ថានកុងស៊ុលអ៊ីរ៉ង់ក្នុងរដ្ឋធានីដាម៉ាសរបស់ប្រទេសស៊ីរីកាលពីព្រឹកមិញ ដោយបានចាត់ទុក សកម្មភាពនេះថា «មិនអាចទទួលយកបានទេ»។

ក្រសួងបាននិយាយនៅក្នុងសេចក្តីថ្លែងការណ៍មួយថា៖«យើងចាត់ទុកការវាយប្រហារណាមួយលើទីតាំង ការទូត និងកុងស៊ុល ភាពមិនអាចរំលោភបំពានដែលត្រូវបានធានាដោយអនុសញ្ញាទីក្រុងវីយែន ដែលពាក់ព័ន្ធថា មិនអាចទទួលយកបានជាដាច់ខាត»។

ដោយកត់សម្គាល់ថា ការវាយប្រហារនេះ ត្រូវបានធ្វើឡើងនៅក្នុងតំបន់ទីប្រជុំជនដែលមានប្រជាជនរស់នៅយ៉ាងច្រើន ជាមួយនឹងហានិភ័យខ្ពស់នៃការស្លាប់បាត់បង់ជីវិតរបស់ជនស៊ីវិល ក្រសួងបាននិយាយថា សកម្មភាព «ឈ្លានពាន» បែបនេះរបស់អ៊ីស្រាអែល គឺ«មិនអាចទទួលយកបាន និងត្រូវតែបញ្ឈប់ជាដាច់ខាត»។

ក្រសួងបានបន្ថែមថា ប្រទេសរុស្ស៊ីទទូចយ៉ាងខ្លាំងដល់ថ្នាក់ដឹកនាំអ៊ីស្រាអែលឲ្យបោះបង់ការអនុវត្តសកម្មភាពយោធាបង្កហេតុ នៅក្នុងប្រទេសស៊ីរី និងប្រទេសជិតខាងដទៃទៀត។

យ៉ាងហោចណាស់មនុស្ស៥នាក់ រួមទាំងមេបញ្ជាការជាន់ខ្ពស់អ៊ីរ៉ង់ម្នាក់ ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលទៅលើអគារស្ថានកុងស៊ុលអ៊ីរ៉ង់ នៅទីក្រុងដាម៉ាស ( Damascus) កាលពីថ្ងៃចន្ទ។ ឧប្បត្តិហេតុនេះ គឺជាការកើនឡើងគួរឲ្យកត់សម្គាល់នៅក្នុងអរិភាពរវាងអ៊ីស្រាអែលនិង អ៊ីរ៉ង់ ព្រោះវាជាការវាយប្រហារលើកដំបូងលើស្ថានទូតអ៊ីរ៉ង់ នៅក្នុងប្រទេសស៊ីរី ចាប់តាំងពីការចាប់ផ្តើមនៃសង្គ្រាមស៊ីវិលស៊ីរី ក្នុងឆ្នាំ ២០១១។

https://english.news.cn/20240402/c9a9a0d7a900493d8fe8ced3a96cef54/c.html