អាយុកាន់តែច្រើន កាន់តែចាស់ មានរឿងច្រើនណាស់ដែលយើងត្រូវតែយល់ដឹង និងចងចាំឱ្យបានច្បាស់ ដើម្បីកុំឱ្យជីវិតនេះ មានរឿងខុសឆ្គង នាំឱ្យស្ដាយក្រោយច្រើន។ ដូច្នេះហើយ បើចង់ឱ្យការរស់នៅក្នុងជីវិតបានសុខសន្តិភាព ស្ងប់ស្ងាត់ ដាច់ខាតកុំពន្យារពេល ឬព្រងើយកន្តើយចំពោះរឿង ២ យ៉ាងនេះ ហើយក៏មិនត្រូវខ្លាចរអាក្នុងរឿង ២ យ៉ាងទៀតដែរ។

១. រឿង ២ យ៉ាងហាមព្រងើយកន្តើយ ឬពន្យារពេល

- សងគុណឪពុកម្ដាយ

ក្នុងជីវិតនេះមានរឿងជាច្រើនដែលអាចរង់ចាំបាន ប៉ុន្តែការគោរព ដឹងគុណចំពោះឪពុកម្តាយមិនអាចពន្យារបានឡើយ ។ ព្រោះឪពុកម្តាយដូចជាដើមចេកទុំ មិនអាចនៅជាមួយយើងជារៀងរហូតបានទេ។ នៅពេលដែលយើងធំឡើង មានការងារ និងមានសមត្ថភាពឯករាជ្យ យើងមិនគួរធ្វេសប្រហែសក្នុងការតបស្នងសងគុណឪពុកម្តាយយើងនោះទេ។ ត្រូវតែឆ្លៀតពេលដើម្បីមើលថែ សួរសុខទុក្ខ និងគោរពឪពុកម្តាយរបស់អ្នក ទាន់ពេលនៅមានឱកាស។ នេះមិនត្រឹមតែជាកាតព្វកិច្ចប៉ុណ្ណោះទេ ប៉ុន្តែក៏ជាការទទួលខុសត្រូវ និងអារម្មណ៍ដ៏ជ្រាលជ្រៅដែលយើងមិនអាចបំភ្លេចបានដែរ។

- ចំពោះសុខភាព

មនុស្សតែងតែងប់ងល់ក្នុងការរកលុយ ស្វែងរកភាពល្បីល្បាញ ហើយភ្លេចថាអ្វីដែលសំខាន់បំផុតក្នុងជីវិតគឺការរក្សាសុខភាព។ ក្នុងវ័យកុមារ យើងតែងតែប្រើប្រាស់សុខភាពជាថ្នូរនឹងលុយ ប៉ុន្តែពេលយើងចាស់ទៅ យើងត្រូវប្រើលុយដើម្បីប្ដូរយកសុខភាពមកវិញ។

សុខភាពគឺជាទ្រព្យសម្បត្តិដ៏មានតម្លៃបំផុតដែលយើងមាន។ នៅពេលដែលយើងជួបប្រទះនឹងជំងឺ និងការឈឺចាប់ យើងយល់ថា បើគ្មានសុខភាពទេ សមិទ្ធិផល និងទ្រព្យសម្បត្តិទាំងអស់នឹងក្លាយទៅជាគ្មានន័យ។ សូមឱ្យតម្លៃ និងថែរក្សាសុខភាពរបស់អ្នកឱ្យបានល្អ ព្រោះមានតែសុខភាពទេ ដែលជាមូលដ្ឋានគ្រឹះសម្រាប់យើង ដើម្បីទទួលបានភាពរីករាយ និងសុភមង្គលក្នុងជីវិត។ នៅពេលដែលយើងមានសុខភាពល្អ យើងក៏មានពេលរកលុយបានច្រើនដែរ មានសុខភាពល្អ ទើបមានអ្វីៗគ្រប់យ៉ាង។

២. រឿង ២ យ៉ាងហាមខ្លាចរអា

- កុំខ្លាចសេចក្ដីស្លាប់

កើតមកជាមនុស្សគ្រប់គ្នាត្រូវប្រឈមមុខនឹងសេចក្ដីស្លាប់ដោយចៀសមិនផុត។ វាជាផ្នែកមួយដែលចៀសមិនរួចនៃវដ្ដធម្មជាតិនៃជីវិត។ ដូច្នេះ ការភ័យខ្លាចនេះមិនមានផលល្អទេ។ ផ្ទុយទៅវិញ ចូររស់នៅក្នុងជីវិតរបស់អ្នកប្រកបដោយអត្ថន័យ និងមានសុភមង្គល។ រីករាយនឹងពេលវេលាជាមួយគ្រួសារ និងមនុស្សជាទីស្រលាញ់។ ឱ្យតម្លៃពេលវេលា ហើយកុំបណ្តោយឱ្យវាកន្លងផុតទៅដោយឥតប្រយោជន៍ឱ្យសោះ ព្រោះជីវិតមនុស្សយើងខ្លីណាស់។

- កុំខ្លាចភាពឯកា

តាំងពីកើតមក ភាពឯកាតែងតែជាអ្វីដែលយើងខ្លាច។ ទោះជាយ៉ាងណាក៏ដោយ នៅពេលដែលយើងយល់ពីអត្ថន័យពិតនៃជីវិត និងស្វែងរកការយល់ដឹងនៅក្នុងភាពឯកា នោះវានឹងលែងជាកង្វល់ទៀតហើយ។ យើងនឹងមានអារម្មណ៍សុខសាន្ត និងភាពស្ងប់ស្ងាត់ក្នុងចិត្ត ហើយស្រឡាញ់រាល់ពេលពិសេសក្នុងដំណើរជីវិត៕