ប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃសៅរ៍ (១៦ មីនា) នេះថា មេដឹកនាំកូរ៉េខាងជើង លោក គីម ជុងអ៊ុន បានត្រួតពិនិត្យសមយុទ្ធយោធាផ្លូវអាកាស ហើយបានជំរុញឱ្យមានការត្រៀមលក្ខណៈ «ប្រាកដនិយម» សម្រាប់ការប្រយុទ្ធ បន្ទាប់ពីសមយុទ្ធប្រចាំឆ្នាំរួមគ្នារបស់កូរ៉េខាងត្បូង និងសហរដ្ឋអាមេរិកបានបញ្ចប់កាលពីដើមសប្ដាហ៍នេះ។

នៅក្នុងរូបថតដែលចេញផ្សាយដោយប្រព័ន្ធផ្សព្វផ្សាយ KCNA លោក គីម ត្រូវបានគេមើលឃើញថាកំពុងពិនិត្យមើលសមយុទ្ធ ដែលបានធ្វើឡើងកាលពីថ្ងៃសុក្រ (១៥ មីនា) ជាមួយកូនស្រីរបស់ខ្លួន និងបានជួបជាមួយក្រុមទាហានឆ័ត្រយោងដែលបានចូលរួមក្នុងការហ្វឹកហ្វឺន។

ប្រព័ន្ធផ្សព្វផ្សាយ KCNA បានបន្ថែមថា លោក គីម បាននិយាយថា លោកពេញចិត្តនឹងការត្រៀមខ្លួនរបស់កងទ័ពកូរ៉េខាងជើង ហើយបានបញ្ជាឱ្យមានការហ្វឹកហ្វឺនដើម្បីទប់ទល់នឹងគ្រប់ប្រភេទនៃសណ្ឋានដី អាកាសធាតុ ពេលវេលា និងលក្ខខណ្ឌធ្ងន់ធ្ងរបំផុតក្នុងសង្រ្គាម។

សមយុទ្ធរបស់កូរ៉េខាងជើង នេះបានធ្វើឡើងបន្ទាប់ពីសមយុទ្ធប្រចាំឆ្នាំរួមគ្នាដែលមានការចូលរួមពីកូរ៉េខាងត្បូង និងសហរដ្ឋអាមេរិក។ សមយុទ្ធរួមគ្នារបស់កូរ៉េខាងត្បូង-អាមេរិកនោះ គឺជាលើកទីមួយចាប់តាំងពីទីក្រុងព្យុងយ៉ាង ក្នុងខែវិច្ឆិកា បានលុបចោលកិច្ចព្រមព្រៀងយោធាអន្តរកូរ៉េឆ្នាំ២០១៨ ក្នុងគោលបំណងកាត់បន្ថយភាពតានតឹង៕

https://m.economictimes.com/news/defence/north-koreas-kim-jong-un-oversees-air-warfare-drills-urges-preparation-for-combat-kcna-says/articleshow/108537551.cms