វីដេអូទទួលបានពីអង្គការសប្បុរសធម៌ World Central Kitchen (WCK) បានបង្ហាញពីជំនួយ កំពុងត្រូវបានរើចេញពីនាវា នៅលើឆ្នេរតំបន់ហ្កាហ្សា កាលពីថ្ងៃសុក្រ។ នាវា Open Arms បានសណ្តោងនាវាផ្ទុកទំនិញមានជំនួយជិត ២០០តោន រៀបចំដោយអង្គការសប្បុរសធម៌ World Central Kitchen (WCK) បានមកដល់ឆ្នេរសមុទ្រតំបន់ហ្កាហ្សា ហើយនាវាទីពីរត្រូវបានគេរំពឹងថា នឹងបើកទៅដល់ក្នុងពេលឆាប់ៗនេះ។

សារព័ត៌មានរ៉យទ័រ អាចបញ្ជាក់ពីទីតាំងនៃវីដេអូ ដោយយោងទៅលើរូបភាពផ្កាយរណបចុងក្រោយ ដែលបង្ហាញពីការសាងសង់កន្លែងចូលចតនាវាផ្ទុកទំនិញ។ អង្គការសប្បុរសធម៌ WCK កំពុងសាងសង់ កំពង់ផែបណ្តោះអាសន្ន ដើម្បីអនុញ្ញាតឱ្យនាវាផ្ទុកទំនិញមានបាតរាប ចូលទៅជិតតំបន់ទឹករាក់នៅហ្កាហ្សា បាន ដោយសារតែកង្វះហេដ្ឋារចនាសម្ព័ន្ធកំពង់ផែត្រឹមត្រូវ។

មានព័ត៌មានលម្អិតមួយចំនួនអំពីរបៀបនៃការដឹកជញ្ជូននិងចែកចាយជំនួយ ដែលនឹងដំណើរការនៅក្នុងតំបន់ហ្កាហ្សា ដោយទីភ្នាក់ងារជំនួយរបស់អង្គការសហប្រជាជាតិ បានចាត់ទុកថាជាឧបសគ្គធំក្នុងការទទួលបានការផ្គត់ផ្គង់ជំនួយដល់អ្នកដែលត្រូវការ។

ជាមួយគ្នានេះ កងទ័ពអ៊ីស្រាអែលបានបញ្ចេញវីដេអូកាលពីថ្ងៃសុក្រ ដែលខ្លួនបាននិយាយថា បានបង្ហាញនាវាសប្បុរសធម៌មួយគ្រឿងមានសណ្តោងនាវាផ្ទុកជំនួយបានទៅដល់ឆ្នេរតំបន់ហ្កាហ្សា។ នាវានេះ កំពុងស្ថិតក្នុងដំណើរការសាកល្បងសម្រាប់ផ្លូវដឹកជញ្ជូនជំនួយថ្មីតាមសមុទ្រពីប្រទេសស៊ីប ចូលទៅក្នុងតំបន់ហ៊ុមព័ទ្ធប៉ាឡេស្ទីនដែលត្រូវបានបំផ្លាញ ជាកន្លែងដែលគ្រោះទុរ្ភិក្សជិតកើតមានឡើង បន្ទាប់ពីរយៈពេលប្រាំខែនៃយុទ្ធនាការយោធារបស់អ៊ីស្រាអែល។

https://www.reuters.com/world/aid-supply-ship-cyprus-reaches-gaza-coast-2024-03-15/