ហ្កាហ្សា ៖ យន្តហោះជាច្រើនគ្រឿង បានទម្លាក់ជំនួយមនុស្សធម៌ចូលទៅក្នុងតំបន់ហ្កាហ្សាភាគខាងជើង កាលពីថ្ងៃសុក្រ ជាលើកទី២ក្នុងសប្តាហ៍នេះ។

លំហូរនៃជំនួយចូលក្នុងតំបន់ហ្កាហ្សា ពីប្រទេសអេហ្ស៊ីប បានថយចុះ ក្នុងរយៈពេលប៉ុន្មានសប្តាហ៍កន្លងទៅនេះ ប៉ុន្តែអ៊ីស្រាអែល បាននិយាយថា ខ្លួនពុំបានរារាំងជំនួយនោះទេ ហើយបានបន្ទោសអង្គការសហប្រជាជាតិ និងភាគីប៉ាឡេស្ទីន ចំពោះការពន្យារពេលជំនួយណាមួយ។

ប្រទេសហ្ស៊កដានី ដែលអង្គការសហប្រជាជាតិ និងម្ចាស់ជំនួយប្រទេសលោកខាងលិច បានប្រែក្លាយឲ្យទៅជាមជ្ឈមណ្ឌលក្នុងតំបន់សម្រាប់ការផ្គត់ផ្គង់មនុស្សធម៌ទៅកាន់តំបន់ហ្កាហ្សា បានអនុវត្តជើងហោះហើរចំនួន៤ជើង ជាលើកដំបូង រួមជាមួយកងទ័ពបារាំង ដើម្បីទម្លាក់ស្បៀងអាហារដល់ជនភៀសខ្លួនរាប់ពាន់នាក់ ដែលកំពុងស្នាក់នៅក្នុងទីជម្រក នៅឆ្នេរសមុទ្រ។

មន្ត្រីជំនួយជាន់ខ្ពស់របស់អង្គការសហប្រជាជាតិ បាននិយាយទៅកាន់ក្រុមប្រឹក្សាសន្តិសុខថា មនុស្សយ៉ាងហោចណាស់ ៥៧៦.០០០នាក់ នៅតំបន់ហ្កាហ្សា ជាចំនួនមួយភាគបួននៃចំនួនប្រជាជនតំបន់ហ្កា បានឈានមួយជំហានចេញពីគ្រោះទុរ្ភិក្ស ដោយព្រមានថាគ្រោះទុរ្ភិក្សរីករាលដាល ស្ទើរតែជៀសមិនរួច ប្រសិនបើគ្មានសកម្មភាពជំនួយណាមួយ។

ក្រសួងសុខាភិបាលតំបន់ហ្កាហ្សា បាននិយាយក្នុងសេចក្តីថ្លែងការណ៍ កាលពីថ្ងៃសុក្រថា យុទ្ធនាការដែនអាកាស និងជើងគោក របស់អ៊ីស្រាអែលនៅតំបន់ហ្កាហ្សា បានសម្លាប់ពលរដ្ឋប៉ាឡេស្ទីន ចំនួន ៣០.២២៨ នាក់ និងរបួស ៧១.៣៧៧ នាក់។ ក្រសួងបាននិយាយបន្ថែមថា ពលរដ្ឋប៉ាឡេស្ទីន ១៩៣ នាក់ត្រូវបានសម្លាប់ និង ៩២០នាក់ បានរងរបួសក្នុងរយៈពេល ២៤ ម៉ោងកន្លងទៅនេះ។

https://www.reuters.com/world/middle-east/israeli-airstrike-hits-gaza-tent-killing-11-gaza-health-ministry-2024-03-02/