នៅពេលដែលទីក្រុងហុងកុងធ្វើការ ដើម្បីពន្លឿនច្បាប់សន្តិសុខជាតិថ្មី នីតិកម្ម និងភាពស្រពេចស្រពិលអំពីការអនុវត្តរបស់ទីក្រុងនេះ បានធ្វើឲ្យមានការភ័យខ្លាចកាន់តែខ្លាំងឡើង ក្នុងចំណោមសហគមន៍អាជីវកម្ម។

សេចក្តីព្រាងច្បាប់ ដែលត្រូវបានប្រកាសនៅឯសភារបស់ទីក្រុង នៅថ្ងៃសុក្រ (ទី៨ ខែមីនា) នេះ រួមបញ្ចូលបទល្មើសធំៗ ដូចជាក្បត់ជាតិ និងបះបោរជាដើម ដែលជាបទល្មើសអាចនឹងត្រូវផ្តន្ទាទោសដាក់ពន្ធនាគារអស់មួយជីវិត។

រដ្ឋបាលទីក្រុងហុងកុង បានឲ្យដឹងថា ខ្លួនមានបំណងអនុម័តសេចក្ដីស្នើច្បាប់នេះឲ្យបានឆាប់តាមដែលអាចធ្វើទៅបាន ដើម្បីបំពេញចន្លោះប្រហោងផ្នែកនីតិបញ្ញត្តិដែលបន្សល់ទុកដោយច្បាប់សន្តិសុខជាតិដែលមានស្រាប់ ពោលគឺជាច្បាប់ដែលទីក្រុងប៉េកាំងដាក់ចេញចំពោះទីក្រុងហុងកុង ក្នុងឆ្នាំ២០២០ បន្ទាប់ពីមជ្ឈមណ្ឌលហិរញ្ញវត្ថុមួយនេះ បានកើតមានការតវ៉ាគាំទ្រលទ្ធិប្រជាធិបតេយ្យយ៉ាងធំ។

អាជ្ញាធរក៏និយាយផងដែរថា នេះជាការទទួលខុសត្រូវតាមរដ្ឋធម្មនុញ្ញរបស់ពួកគេ ក្នុងការអនុម័តច្បាប់សន្តិសុខជាតិក្នុងស្រុក ដោយយោងតាមច្បាប់មូលដ្ឋានរបស់ទីក្រុងហុងកុង ជារដ្ឋធម្មនុញ្ញកម្រិតតូចដែលគ្រប់គ្រងទីក្រុងនេះ គិតចាប់តាំងពីចក្រភពអង់គ្លេសប្រគល់ទីក្រុងនេះឲ្យប្រទេសចិនវិញ ក្នុងឆ្នាំ១៩៩៧។

ប៉ុន្តែលោក Kristian Odebjer ប្រធានសភាពាណិជ្ជកម្មស៊ុយអែត នៅទីក្រុងហុងកុង បាននិយាយថា ប៉ុន្តែទីក្រុងនេះកំពុងចូលទៅក្នុង «ស្ថានភាពថ្មី និងមិនធ្លាប់មាន» ជាមួយនឹងសេចក្ដីស្នើច្បាប់នេះ។

សូមបញ្ជាក់ថា បទល្មើសរបស់សេចក្ដីស្នើច្បាប់នេះ រួមមានការក្បត់ជាតិ ការបះបោរ ចារកម្ម និងការលួចព័ត៌មានសម្ងាត់របស់រដ្ឋ ការបំផ្លិចបំផ្លាញសន្តិសុខជាតិ និងការជ្រៀតជ្រែកពីខាងក្រៅ៕

https://www.businesstimes.com.sg/international/fears-grow-hong-kong-s-finance-hub-status-under-proposed-security-law