សហរដ្ឋអាមេរិកកាលពីថ្ងៃព្រហស្បតិ៍ បានចោទប្រកាន់រដ្ឋាភិបាលវ៉េណេហ្ស៊ុយអេឡាពីការខកខានមិនបានផ្តល់នូវការប្តេជ្ញាចិត្តសំខាន់ៗមួយចំនួនរបស់ខ្លួន ដែលបាននាំឲ្យមានការបន្ធូរបន្ថយទណ្ឌកម្មរបស់សហរដ្ឋអាមេរិកកាលពីឆ្នាំមុន ទោះបីជាមានការប្រកាសនៅសប្តាហ៍នេះអំពីកាលបរិច្ឆេទនៃការបោះឆ្នោតប្រធានាធិបតី នៅថ្ងៃទី២៨ ខែកក្កដាក៏ដោយ។

ថ្លែងទៅកាន់វិទ្យាស្ថានស្រាជ្រាវមួយនៅក្នុងទីក្រុងវ៉ាស៊ីនតោន លោក Brian Nichols ជំនួយការរដ្ឋមន្ត្រីការបរទេសសហរដ្ឋអាមេរិកទទួលបន្ទុកកិច្ចការអឌ្ឍគោលលោកខាងលិច បាននិយាយថា ប្រធានាធិបតី        វ៉េណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) បានចាត់វិធានការមួយចំនួនក្នុង «ទិសដៅខុស»។ លោកបាននិយាយថា វិធានការទាំងនេះរួមមានការរក្សាការហាមឃាត់ការបោះឆ្នោតលើលោកស្រី Maria Corina Machado ដែលជាបេក្ខជននាំមុខរបស់គណបក្សប្រឆាំង និងការចាប់ខ្លួនសកម្មជនបក្សប្រឆាំងរាប់សិបនាក់។

ទីក្រុងវ៉ាស៊ីនតោន បានប្តេជ្ញានឹងដាក់ទណ្ឌកម្មឡើងវិញលើវិស័យថាមពលដ៏សំខាន់របស់រដ្ឋសមាជិក OPEC នៅពាក់កណ្តាលខែមេសា លុះត្រាតែលោកស្រី Machado មិនត្រូវបានអនុញ្ញាតឲ្យដំណើរការទេនោះ ហើយលោកម៉ាឌូរ៉ូ ធ្វើតាមការសន្យាផ្សេងទៀត ដែលបានធ្វើឡើងនៅក្នុងកិច្ចព្រមព្រៀងជាមួយក្រុមប្រឆាំង នៅទីក្រុងបាបាដូស ( Barbados)ក្នុងខែតុលា។

លោក Nichols បានថ្លែងថា៖«ពេលវេលាកំណត់ មានភាពតឹងតែង ហើយយើងមិនចង់ធ្វើការវិនិច្ឆ័យជាមុនថាតើអ្វីៗនឹងទៅជាយ៉ាងណា ប៉ុន្តែទិសដៅនៃការធ្វើដំណើរ (ដោយរដ្ឋាភិបាលរបស់លោកម៉ាឌូរ៉ូ) គឺមានការព្រួយបារម្ភយ៉ាងខ្លាំង»។

លោកបានបន្ថែមថា៖«យើងសម្លឹងមើលការធ្វើការជាមួយតួអង្គប្រជាធិបតេយ្យនៅវ៉េណេហ្ស៊ុយអេឡា និងដៃគូរបស់យើងនៅជុំវិញតំបន់ ដើម្បីកំណត់ថាតើយើងឆ្លើយតបយ៉ាងដូចម្តេច?»។

https://www.reuters.com/world/americas/venezuela-failing-meet-some-key-commitments-despite-election-announcement-us-2024-03-07/