ក្រុមសាក្សី និងគ្រូពេទ្យ បាននិយាយថា កងកម្លាំងអ៊ីស្រាអែលកាលពីថ្ងៃព្រហស្បតិ៍ បានបើកការបាញ់ប្រហារទៅលើជនជាតិប៉ាឡេស្ទីនរាប់ពាន់នាក់ ដែលបានប្រមូលផ្តុំគ្នានៅក្នុងតំបន់បើកចំហនៃទីក្រុងហ្កាហ្សា ដោយសង្ឃឹមថា នឹងទទួលបានអាហារ និងជំនួយមនុស្សធម៌ផ្សេងទៀត ដែលត្រូវការយ៉ាងខ្លាំង។ 

ក្រុមហាម៉ាសដែលបានគ្រប់គ្រងតំបន់ហ្កាហ្សាស្ទ្រីបអស់រយៈពេលជិតពីរទសវត្សរ៍ មុនពេលបង្កឲ្យមានសង្រ្គាមបច្ចុប្បន្នជាមួយនឹងការវាយប្រហារភេរវកម្មថ្ងៃទី៧ ខែតុលារបស់ខ្លួនលើអ៊ីស្រាអែល បានអះអាង ថា កងកម្លាំងអ៊ីស្រាអែល «បានកំណត់គោលដៅ ពលរដ្ឋរាប់ពាន់នាក់ប្រមូលផ្តុំគ្នា ខណៈពេលដែលពួកគេកំពុងរង់ចាំទទួលជំនួយស្បៀងអាហារ»។

ក្រសួងសុខាភិបាលដែលគ្រប់គ្រងដោយក្រុមហាម៉ាសនៅតំបន់ហ្កាហ្សា បានឲ្យដឹងថា យ៉ាងហោចណាស់មនុស្ស ១០៤នាក់ បានស្លាប់ និងជាង ៧៥០នាក់ផ្សេងទៀត បានរងរបួស។

កងកម្លាំងការពារអ៊ីស្រាអែល (IDF) បាននិយាយថា ការស្លាប់និងរបួស គឺជាលទ្ធផលនៃការប្រមូលផ្តុំគ្នាដោយហិង្សារបស់អ្នកស្រុកហ្កាហ្សាជុំវិញរថយន្តជំនួយ ក្នុងអំឡុងពេលដែលខ្លួន បាននិយាយថា មនុស្សរាប់សិបនាក់បាន «រងរបួសដោយសារការប៉ះទង្គិច និងជាន់គ្នា»។

ពេលក្រោយ មន្ត្រីIDFម្នាក់ បាននិយាយថា បន្ទាប់ពីភាពចលាចល នៅចំណុចឆ្លងកាត់ក្បែរនោះ រវាងភាគខាងជើង និងភាគខាងត្បូង កងកម្លាំងអ៊ីស្រាអែលពីដំបូង បានបាញ់ព្រមាន ហើយបន្ទាប់មកបានបាញ់ប្រហារទៅលើជនស៊ីវិល ដែលបានសម្រុកទៅរករថយន្តផ្តល់ជំនួយ និងរថក្រោះរបស់ IDF ដែលមានកងកម្លាំង ជួយការពារក្បួនរថយន្តជំនួយ។ មន្ត្រីរូបនេះ បានបន្តថា កងកម្លាំង IDF បាន «បាញ់ទៅលើអ្នកដែលបង្កការគំរាមកំហែង» ហើយបានសង្កត់ធ្ងន់ថា ឧប្បត្តិហេតុនេះ នៅតែស្ថិតក្រោមការត្រួតពិនិត្យ។

https://apnews.com/article/israel-hamas-war-latest-02-29-2024-ae3d114b28cafd3b1a806bfaa9f83cab