មន្ត្រីសុខាភិបាលនីហ្សេរីយ៉ា បានបញ្ជាក់ប្រាប់រ៉យទ័រ កាលពីថ្ងៃទី១៥ ខែមីនា ឆ្នាំ២០១៩ថា ជនរងគ្រោះបាត់បង់ជីវិតបានកើន២០នាក់ ក្នុងហេតុការណ៍បាក់អគារសាលាបឋមសិក្សាកម្ពស់៤ជាន់ នៅទីក្រុង Lagos ប្រទេសនីហ្សេរីយ៉ា កាលពីថ្ងៃពុធនោះ ។

មន្ត្រីសុខាភិបាលនីហ្សេរីយ៉ា មិនបានបញ្ជាក់នោះទេ ថា សិស្សសាលាប៉ុន្មាននាក់ស្ថិតនៅចំណោមជនរងគ្រោះបាត់បង់ជីវិត គ្រាន់តែបញ្ជាក់ថា ក្មេង១០នាក់ និងយុវជន៤នាក់កំពុងត្រូវបានសង្គ្រោះពីក្រុមគ្រូពេទ្យ ។

ការបាក់រលំអគារ គឺញឹកញាប់បំផុតកើតមាននៅក្នុងប្រទេសនីហ្សេរីយ៉ា ។ ច្បាប់សាងសង់សំណង់អគារនៅក្នុងប្រទេសតំបន់អាហ្វ្រិកមួយនេះ មិនត្រូវបានអនុវត្តត្រឹមត្រូវតាមស្តង់ដារនោះឡើយ ។

ទីក្រុង Lagos ជាទីក្រុងល្បីល្បាញ់របស់នីហ្សេរីយ៉ា មានមនុស្សរស់នៅប្រហែល២៣លាននាក់ ។ ពលរដ្ឋភាគច្រើនមានជីវភាពក្រីក្រ និងរស់នៅប្រជៀតគ្នា ។

អគារសាលាបឋមសិក្សាដែលបាក់រលំនេះ ត្រូវសាក្សីអះអាងថា មានសិស្សសាលាប្រហែល១០០នាក់ ។ ប៉ុន្តែគេមិនច្បាស់ថា មានសិស្សសាលាប៉ុន្មាននាក់ នៅក្នុងអំឡុងហេតុការណ៍បាក់រលំនោះទេ ។

ក្រុមជួយសង្គ្រោះ ទើបតែបានបញ្ចប់ការស្វែងរកជនរងគ្រោះដែលកប់នៅពីក្រោមគំនរបាក់បែក កាលពីថ្ងៃព្រហស្បតិ៍ ។ សាកសពចុងក្រោយនេះ រកឃើញ៣នាក់ ។ កាលពីពីរបីឆ្នាំកន្លងមក នៅក្នុងតំបន់នេះ ក៏មានហេតុការណ៍បាក់រលំអគារផងដែរ ។

អភិបាលក្រុង Lagos លោក Akinwuni Ambode បានបញ្ជាក់ថា អគារសាលាដែលបាក់រលំនេះ ពុំមានច្បាប់ទម្លាប់នោះទេ ។ មូលហេតុហេតុការណ៍នេះ កំពុងស្ថិតក្រោមការស៊ើបអង្កេត ៕