ការសេម្រេចរបស់ប្រធានាធិបតីវ៉េណេហ្ស៊ុយអេឡា លោក នីកូឡា ម៉ាឌូរ៉ូ (Nicolás Maduro) ក្នុងការចុះហត្ថលេខាលើច្បាប់ ដែលជាលទ្ធផលនៃការបោះឆ្នោតប្រជាមតិនាពេលថ្មីៗនេះ ដោយទាមទារ២ភាគ៣នៃប្រទេសហ្គីយ៉ាន បានបង្កឲ្យមានការថ្កោលទោសយ៉ាងខ្លាំងក្លាកាលពីថ្ងៃព្រហស្បតិ៍ពីរដ្ឋាភិបាលរបស់ប្រទេសជិតខាងនៅអាមេរិកខាងត្បូងនេះ។

អត្ថបទច្បាប់នោះ មិនត្រូវបានគេផ្សព្វផ្សាយភ្លាមៗទេ។

ទោះបីជាយ៉ាងនេះក្តី ក្រសួងការបរទេសហ្គីយ៉ាន បានប្តេជ្ញាថានឹងមិនផ្តល់ដីណាមួយដល់ប្រទេសវ៉េណេហ្ស៊ុយអេឡា ហើយបានហៅការសម្រេចដែលផ្តោតលើតំបន់Essequibo ភាគខាងលិចរបស់ប្រទេសហ្គីយ៉ានថា ជាការរំលោភបំពានយ៉ាងធ្ងន់ធ្ងរលើគោលការណ៍ជាមូលដ្ឋាននៃច្បាប់អន្តរជាតិ។

កាលពីដើមខែធ្នូ លោកម៉ាឌូរ៉ូ បានធ្វើប្រជាមតិមួយ ដើម្បីទាមទារអធិបតេយ្យភាពលើតំបន់សម្បូរប្រេង និងរ៉ែ ដែលតំណាងឲ្យ ២ភាគ៣នៃប្រទេសហ្គីយ៉ាន ដោយលើកហេតុផលថា តំបន់នេះ ត្រូវបានលួច នៅពេលដែលព្រំដែន ត្រូវបានគូសជាងមួយសតវត្សរ៍មុន។ កាលពីថ្ងៃពុធ លោកម៉ាឌូរ៉ូ បានធ្វើពិធីចុះហត្ថលេខា ដោយរំឭកពីការធ្វើប្រជាមតិថាជា «ពេលវេលាដ៏សំខាន់ និងជាប្រវត្តិសាស្ត្រ»។

លោកម៉ាឌូរ៉ូ បានសរសេរនៅលើគេហទំព័រ Twitter កាលពីថ្ងៃពុធថា៖«សេចក្តីសម្រេចកាលពីថ្ងៃទី៣ ខែធ្នូ ឥឡូវនេះ បានក្លាយទៅជាច្បាប់នៃសាធារណរដ្ឋ ដើម្បីបង្កើតជាផ្នែកនៃរចនាសម្ព័ន្ធច្បាប់នៃចលនានយោបាយ និងស្ថាប័នផ្ទៃក្នុងនៃប្រទេសរបស់យើង»។ «ការសម្រេចចិត្តដែលធ្វើឡើងដោយប្រជាជន    វ៉េណេហ្ស៊ុយអេឡា ក្នុងការធ្វើប្រជាមតិពិគ្រោះយោបល់ នឹងត្រូវបានបំពេញគ្រប់ផ្នែកទាំងអស់ ហើយជាមួយនឹងច្បាប់នេះ យើងនឹងបន្តការពារប្រទេសវ៉េណេហ្ស៊ុយអេឡា នៅលើឆាកអន្តរជាតិ»។

https://www.ptinews.com/story/international/guyana-condemns-venezuela-for-signing-into-law-a-referendum-approving-annexation-of-disputed-region/1406500