អាមេរិក÷ លោកប្រធានាធិបតី វ៉ូឡូមៀ ហ្សេឡិនស្គី ( Volodymyr Zelensky) បានព្រមានថា កងកម្លាំងអ៊ុយក្រែននឹងត្រូវប្រគល់ទឹកដីបន្ថែមទៀតទៅឲ្យប្រទេសរុស្ស៊ី ប្រសិនបើជំនួយយោធារបស់សហរដ្ឋអាមេរិក មិនមកដល់ក្នុងពេលឆាប់ៗនេះ ជាការអំពាវនាវចុងក្រោយរបស់លោកទៅកាន់សភាឲ្យអនុម័តកញ្ចប់ថវិការាប់ពាន់លានដុល្លារ។

រដ្ឋបាលរបស់លោកប្រធានាធិបតីលោកចូ បៃដិន កំពុងតស៊ូជំរុញកញ្ចប់ជំនួយអន្តរជាតិចំនួន ៩៥ពាន់លានដុល្លារ ដែលរួមមាន ៦០ពាន់លានដុល្លារសម្រាប់អ៊ុយក្រែន តាមរយៈសភាតំណាងច្រើនជាងខែ ចាប់តាំងពីវាត្រូវបានអនុម័ត នៅក្នុងព្រឹទ្ធសភា។

លោកហ្សេឡិនស្គី បានព្រមានថា កង្វះជំនួយ គឺជារឿងបន្ទាន់ ហើយអាចបង្កគ្រោះថ្នាក់ដល់ទីក្រុងធំៗរបស់អ៊ុយក្រែន។

លោកបានប្រាប់សារព័ត៌មាន The Washington Post ក្នុងអំឡុងពេលសម្ភាសន៍ថ្មីៗនេះថា៖«ប្រសិនបើមិនមានការគាំទ្រពីសហរដ្ឋអាមេរិកទេ វាមានន័យថា យើងគ្មានប្រព័ន្ធការពារដែនអាកាស គ្មានមីស៊ីល Patriot គ្មានឧបករណ៍សម្រាប់ទប់ស្កាត់សង្គ្រាមអេឡិចត្រូនិច គ្មានគ្រាប់កាំភ្លើងធំធុន ១៥៥មីល្លិម៉ែត្រ។ “នោះមានន័យថា យើងនឹងដកថយក្រោយ ដកថយ មួយជំហានម្តងៗ ជាជំហានតូចៗ»។

លោកបាននិយាយថា ទីក្រុងគីវ នឹងត្រូវបង្ខំចិត្តធ្វើតិចជាងមុន និងផ្តល់អាទិភាពដល់ធនធាន ហើយការកាត់បន្ថយជំនួយ អាចមានផលវិបាកច្រើន។

លោកបានពន្យល់ថា៖«ប្រសិនបើអ្នកត្រូវការគ្រាប់ចំនួន ៨.000 គ្រាប់ក្នុងមួយថ្ងៃ ដើម្បីការពារខ្សែត្រៀមជួរមុខ ប៉ុន្តែអ្នកមានត្រឹមតែ ២.000គ្រាប់ប៉ុណ្ណោះ អ្នកត្រូវតែធ្វើតិចជាងនេះ» ដោយបញ្ជាក់ថា ដំណោះស្រាយនេះ អាចធ្វើកាត់បន្ថយខ្សែត្រៀមជួរមុខឲ្យខ្លីជាងមុន។

https://www.jpost.com/breaking-news/article-794389