វិមានក្រឹមឡាំង ដែលធ្វើសេចក្តីអត្ថាធិប្បាយពីអនុសាសន៍របស់ប្រធានាធិបតីបារាំងលោក Emmanuel Macron លើលទ្ធភាពនៃការបញ្ជូនទាហានទៅកាន់អ៊ុយក្រែន និយាយនៅថ្ងៃសុក្រនេះថា បារាំង បានជាប់ពាក់ព័ន្ធរួចទៅហើយក្នុងសង្រ្គាមអ៊ុយក្រែន ហើយបច្ចុប្បន្នពួកគេផ្តល់សញ្ញាថា ពួកគេត្រៀមខ្លួនរួចរាល់ក្នុងការជាប់ពាក់ព័ន្ធកាន់តែជ្រៅជាងនេះ ។ 

គួរឲ្យដឹងថា លោក Macron បាននិយាយកាលពីថ្ងៃព្រហស្បតិ៍ថា អឺរ៉ុបគួរតែត្រៀមខ្លួនសម្រាប់សង្រ្គាម ប្រសិនបើខ្លួនចង់បានសន្តិភាព ដោយចាត់ទុកប្រទេសរុស្ស៊ី របស់ប្រធានាធិបតី លោក Vladimir Putin ថាជាសត្រូវ ដែលមិនបានបញ្ឈប់សង្គ្រាមនៅក្នុងប្រទេសអ៊ុយក្រែន ក្នុងជម្លោះដែលមានរយៈពេលពីរឆ្នាំមកនេះ ។ 

លោក Macron បានបង្កឲ្យមានភាពចម្រូងចម្រាសកាលពីខែមុន បន្ទាប់ពីលោក បាននិយាយថា លោកមិនអាចច្រានចោលការដាក់ពង្រាយកងទ័ពទៅក្នុងប្រទេសអ៊ុយក្រែននាពេលអនាគតបានទេ ដោយមេដឹកនាំជាច្រើនរូប បានងាកចេញពីបញ្ហាមួយនេះ ខណៈអ្នកផ្សេងទៀត ជាពិសេសនៅអឺរ៉ុបខាងកើត បានសម្តែងការគាំទ្រ ។ 

លោក Dmitry Peskovគឺជាអ្នកនាំពាក្យវិមានក្រឹមឡាំង និយាយថា ពួកយើងបានអានសេចក្តីថ្លែងការណ៍របស់លោក Macron ។ ជាការពិតណាស់ថា រុស្ស៊ីគឺជាសត្រូវរបស់បារាំង នេះច្បាស់ក្រឡែត ដោយសារតែបារាំង ត្រៀមខ្លួនរួចរាល់ក្នុងការជាប់ពាក់ព័ន្ធជាមួយសង្រ្គាមនៅអ៊ុយក្រែន ។ 

លោកបន្តថា ជាការពិតណាស់ថា វាគឺជាការចូលរួមដោយប្រយោលនៅក្នុងសង្រ្គាមមួយនេះ ។ តាមរយៈការវាយតម្លៃសេចក្តីថ្លែងការណ៍របស់ប្រធានាធិបតីបារាំង លោកមិនជំទាស់នោះទេចំពោះការបង្កើនកម្រិតនៃការជាប់ពាក់ព័ន្ធក្នុងសង្រ្គាមអ៊ុយក្រែន ៕

https://www.zawya.com/en/world/uk-and-europe/kremlin-says-macron-has-shown-france-is-ready-for-deeper-ukraine-war-involvement-ivn5h3xa