ក្រុមហ៊ុនថាមពលពន្លឺព្រះអាទិត្យយក្សរបស់ចិន Longi Green Energy Technology Co កំពុងអំពាវនាវឲ្យទីក្រុងប៉េកាំងបង្ក្រាបទៅលើតម្លៃទាបៗ និងធានាគុណភាពបន្ទះសូឡា ដោយសារសមត្ថភាពលើសកម្រិត និងការប្រកួតប្រជែងដ៏ខ្លាំងក្លាជំរុញឲ្យក្រុមហ៊ុន បរាជ័យ។

ប្រធានក្រុមហ៊ុន Longi លោក Zhong Baoshen បាននិយាយនៅក្នុងបទសម្ភាសន៍មួយជាមួយសារព័ត៌មាន Securities News ថា រដ្ឋាភិបាល គួរតែណែនាំច្បាប់ដេញថ្លៃថ្មី ដើម្បីបង្អាក់តម្លៃដែលទាបជាងថ្លៃដើមផលិតកម្ម និងផ្តល់រង្វាន់ដល់ក្រុមហ៊ុនដែលអាចផ្តល់នូវផលិតផលដែលអាចទុកចិត្តបានយូរអង្វែង។ លោក Zhong បានធ្វើការអត្ថាធិប្បាយនៅខាងក្រៅសភាប្រជាជនជាតិ ក្នុងសប្តាហ៍នេះ ដែលលោកកំពុងចូលរួមជាប្រតិភូ។

ឧស្សាហកម្មថាមពលពន្លឺព្រះអាទិត្យរបស់ចិន កំពុងរងការវាយប្រហារដោយការកាត់បន្ថយការផលិត និងការបញ្ឈប់ការងារ ទោះបីជាការដំឡើងនៅឆ្នាំនេះ ត្រូវបានគេព្យាករថា នឹងនៅតែជិតកំណត់ត្រា ដែលបានកំណត់ នៅឆ្នាំ២០២៣។ ការអត្ថាធិប្បាយពីក្រុមហ៊ុន Longi ដែលជាក្រុមហ៊ុនផលិតបន្ទះសូឡាដ៏ធំបំផុតរបស់ពិភពលោក បានធ្វើតាមការព្រមានកាលពីចុងឆ្នាំមុនពីលោក Gao Jifan ដែលជាប្រធាននៃក្រុមហ៊ុន Trina Solar Co.,ថា ក្រុមហ៊ុនតូចៗ នឹងត្រូវបានរឹតបន្តឹង ដោយសារតែតម្លៃទាបពេក។

លោក Zhong បាននិយាយថា ក្រុមហ៊ុនផលិតមួយចំនួនដែលកំពុងឈ្នះការដេញថ្លៃជាមួយនឹងតម្លៃទាបជាងនេះ អាចផ្តល់បានតែបន្ទះសូឡាមានគុណភាពទាបប៉ុណ្ណោះ ដែលនឹងធ្វើឲ្យប៉ះពាល់ដល់អ្នកផលិតផ្សេងទៀតដែលកំពុងវិនិយោគលើការច្នៃប្រឌិតបច្ចេកវិទ្យា និងបង្អាក់ពួកគេពីការបង្កើតផលិតផលកាន់តែប្រសើរឡើង។ លោកបានបន្តថា៖ «ក្រុមហ៊ុនធំៗ មានការព្រួយបារម្ភយ៉ាងខ្លាំងចំពោះបញ្ហានេះ»។

https://www.businesstimes.com.sg/companies-markets/energy-commodities/china-s-top-solar-panel-maker-calls-on-beijing-to-control-prices