តាមពិតជីវិតនេះសាមញ្ញខ្លាំងណាស់ តែមនុស្សយើងទេ ដែលចូលចិត្តគិតច្រើនចាក់ស្មុគ នាំឱ្យមានរឿងស្មុគស្មាញ។ តែយ៉ាងណា ប្រសិនបើយើងអាចធ្វើរឿងទាំង ៨ ចំណុចនេះបាន យើងនឹងមានសំណាង មានសុភមង្គលច្រើននៅក្នុងជីវិត។

១. គិតវិជ្ជមាន

មនុស្សរស់នៅក្នុងជីវិត អារម្មណ៍គឺសំខាន់បំផុត។ នៅពេលដែលអ្នកគិតថាខ្លួនឯងគិតអវិជ្ជមាន ចូរព្យាយាមផ្លាស់ប្តូរគំនិតនោះទៅជាអ្វីដែលវិជ្ជមាន។ នៅពេលដែលចិត្តរបស់អ្នកមិនស្ថិតស្ថេរ អ្នកមានអារម្មណ៍បាក់ទឹកចិត្តភ្លាមៗ ហើយដើរថយក្រោយពេលជួបបញ្ហា។ នេះនឹងធ្វើឱ្យអ្នកស្អប់ខ្លួនឯងបន្តិចម្តងៗ និងធ្វើទារុណកម្មខ្លួនឯង។

ដើម្បីធ្វើឱ្យជីវិតរបស់អ្នកកាន់តែរីករាយ រឿងដំបូងដែលអ្នកត្រូវផ្លាស់ប្តូរគឺរបៀបគិតរបស់អ្នក។ រក្សាភាពវិជ្ជមាន យូរៗទៅអ្នកនឹងឃើញគំនិត និងរឿងវិជ្ជមានទាំងនេះបង្កើតដោយខ្លួនឯងដោយមិនចាំបាច់ប្រឹងប្រែងដើម្បីបង្កើតវាឡើយ។

២. អត់ទោសឱ្យអ្នកដែលធ្វើបាបអ្នក

ការបណ្ដុះអារម្មណ៍អវិជ្ជមាន នឹងធ្វើឱ្យអ្នកមិនសប្បាយចិត្ត មិនថាស្ថិតក្នុងកាលៈទេសៈណាក៏ដោយ។ ដោយការអត់ទោសឱ្យអ្នកដែលបានធ្វើឱ្យអ្នកឈឺចាប់ អ្នកក៏អាចរសាយពីការឈឺចាប់បានដូចគ្នាដែរ។ បន្ទាប់មកអ្នកនឹងអាចបន្តទៅមុខបានហើយសប្បាយចិត្តក៏ច្រើនជាងមុន។

៣. ញញឹមឱ្យបានញឹកញាប់

ក្នុងចំណោមការផ្លាស់ប្តូររបៀបរស់នៅទាំងអស់ នេះអាចជាការងាយស្រួលបំផុតក្នុងការធ្វើ។ ការបង្ខំស្នាមញញឹមអាចធ្វើឱ្យអ្នកកាន់តែសប្បាយចិត្ត ទោះបីជាវាស្តាប់ទៅដូចជាមិនសមហេតុផលក៏ដោយ តែមានការស្រាវជ្រាវជាច្រើន ដែលបង្ហាញថា ទ្រឹស្តីនេះជារឿងដែលត្រឹមត្រូវ។ ការស្រាវជ្រាវបង្ហាញថា ទឹកមុខសាមញ្ញអាចបង្កឱ្យមានអារម្មណ៍។ ខួរក្បាលរបស់អ្នកអាចដឹងពីអារម្មណ៍ដែលអ្នកកំពុងព្យាយាមបង្ហាញ ហើយអ្នកនឹងចាប់ផ្តើមមានអារម្មណ៍សប្បាយរីករាយបន្តិចម្តងៗ។

៤. ចំណាយពេលធ្វើអ្វីដែលអ្នកស្រលាញ់

នៅពេលដែលជីវិតមានភាពមមាញឹក ពេលវេលាសម្រាប់ខ្លួនឯងហាក់ដូចជាត្រូវបានមើលរំលង។ រឿងសំខាន់ដែលអាចជួយអ្នកកាត់បន្ថយភាពតានតឹង និងរីករាយជាងនេះ គឺការផ្តល់អាទិភាពដល់ការសម្រាកលម្ហែ។ ឆ្លៀតពេលធ្វើអ្វីដែលអ្នកពេញចិត្ត នោះអ្នកនឹងមានអារម្មណ៍សប្បាយចិត្តកាន់តែច្រើន។

៥. កុំការប្រៀបធៀបខ្លួនឯងជាមួយអ្នកដទៃ

នៅក្នុងយុគសម័យនៃការរីកលូតលាស់ប្រព័ន្ធផ្សព្វផ្សាយឌីជីថល វាជាការងាយស្រួលក្នុងការប្រៀបធៀបនរណាម្នាក់ជាមួយនឹងនរណាម្នាក់ផ្សេងទៀត ដោយផ្អែកលើអ្វីដែលពួកគេបានបង្ហាញ។ ទោះជាយ៉ាងណាក៏ដោយ អ្នកត្រូវចៀសវាងបញ្ហានេះ ព្រោះវាអាចប៉ះពាល់ដល់សុភមង្គលរបស់អ្នក។ គ្មានជីវិតរបស់អ្នកណាម្នាក់ល្អឥតខ្ចោះនោះឡើយ ដូច្នេះហើយ ឈប់ប្រៀបធៀបខ្លួនឯងជាមួយអ្នកដទៃទៀតទៅ ត្រូវពេញចិត្តនឹងអ្វីដែលយើងមាន ទើបជីវិតមានក្ដីសុខ។

៦. គ្រប់គ្រងហិរញ្ញវត្ថុ

លុយអាចជាឧបសគ្គដ៏ធំ នៅក្នុងការរស់នៅដ៏មានសុភមង្គល។ ការគ្រប់គ្រងហិរញ្ញវត្ថុ គឺជាជំនាញមួយដែលមិនអាចខ្វះបានក្នុងជីវិត។ នៅពេលអ្នកយល់ច្បាស់ពីគោលគំនិត និងការអនុវត្ត នោះចិត្តរបស់អ្នកនឹងកាន់តែមានផាសុកភាព និងសុវត្ថិភាព ពេលដែលជួបបញ្ហាការលំបាក តែអ្នកមានលុយកាក់សម្រាប់ប្រើប្រាស់ អ្នកក៏នឹងមិនបាច់ខ្វល់ បារម្ភច្រើនឡើយ។ អ្នកក៏អាចរៀបចំផែនការសន្សំ សម្រាប់គម្រោងនាពេលខាងមុខ។ នេះនឹងធ្វើឱ្យអ្នកកាន់តែងាយស្រួល និងមិនសូវតានតឹងសម្រាប់អ្នក នៅពេលដែលវាដល់ពេលប្រើប្រាស់លុយ។

៧. ផ្តល់អាទិភាពដល់ការហាត់ប្រាណ

លំហាត់ប្រាណអាចផ្លាស់ប្តូរជីវិតតាមវិធីជាច្រើន។ ក្រៅពីឥទ្ធិពលលើរាងកាយ ការហាត់ប្រាណក៏អាចជួយដល់ផ្លូវចិត្តរបស់អ្នកបានដែរ។ ការសិក្សាជាច្រើនបង្ហាញថា លំហាត់ប្រាណទៀងទាត់ អាចធ្វើឱ្យអ្នកសប្បាយចិត្ត និងឆ្លាតជាងមុន។ អ្នកអាចចាប់ផ្តើមបន្តិចម្តងៗ បង្កើនរយៈពេល និងអាំងតង់ស៊ីតេតាមពេលវេលា។ ការដើរជារៀងរាល់ល្ងាច ឬធ្វើយូហ្គាម្តងក្នុងមួយថ្ងៃ គឺជាការចាប់ផ្តើមដ៏ល្អ។

៨ . ទទួលទានរបបអាហារមានតុល្យភាព

ការថែរក្សារាងកាយរបស់អ្នក គឺចាំបាច់នៅពេលដែលវាមកដល់សុខុមាលភាពរបស់អ្នក។ អ្នកនឹងមានអារម្មណ៍ល្អប្រសើរ គិតឱ្យបានច្បាស់ និងមានសុភមង្គលជាងប្រសិនបើអ្នកមានរាងកាយដែលមានសុខភាពល្អ។ ការសិក្សាជាច្រើនបង្ហាញថា អាហារដែលមានសុខភាពល្អអាចបង្កើនបរិមាណ serotonin, dopamine និង norepinephrine នៅក្នុងខ្លួនរបស់អ្នក។ ទាំងនេះគឺជាអរម៉ូនដែលនឹងធ្វើឱ្យអ្នកមានអារម្មណ៍ល្អ បង្កើនកម្រិតថាមពលរបស់អ្នក និងជួយអ្នកឱ្យផ្តោតអារម្មណ៍៕