វិទ្យាស្ថានដើម្បីសិក្សាពីសង្គ្រាម (ISW) បាននិយាយនៅក្នុងរបាយការណ៍កាលពីថ្ងៃទី៣ ខែមីនារបស់ខ្លួនថា ប្រទេសរុស្ស៊ី កំពុងធ្វើយុទ្ធនាការផ្សព្វផ្សាយព័ត៌មានមិនពិតទាក់ទងនឹងការចរចាសន្តិភាព ដើម្បីទទួលបានសម្បទានជាមុនពីលោកខាងលិច មុននឹងឈានដល់កិច្ចពិភាក្សា។

ក្រុមអ្នកវិភាគ បាននិយាយថា៖«មន្រ្តីរុស្ស៊ី បន្តបន្ទោសអ៊ុយក្រែន និងលោកខាងលិចចំពោះការខ្វះខាតការចរចាសន្តិភាពរវាងរុស្ស៊ី និងអ៊ុយក្រែន ទោះបីជាមានសេចក្តីថ្លែងការណ៍ជាសាធារណៈជាច្រើនរបស់រុស្ស៊ីដែលលើកឡើងឬបញ្ជាក់យ៉ាងច្បាស់ថា រុស្ស៊ីមិនចាប់អារម្មណ៍លើការចរចាសន្តិភាពដោយស្មោះត្រង់ជាមួយអ៊ុយក្រែនក៏ដោយ»។

វិទ្យាស្ថាន ISW បាននិយាយថា ប្រទេសចិន និងទួរគី បានបង្ហាញពីចំណាប់អារម្មណ៍ ក្នុងការសម្របសម្រួលការចរចាសន្តិភាពរវាងរុស្ស៊ី និងអ៊ុយក្រែន ហើយមន្ត្រីរុស្ស៊ី កំពុងទាញយកផលប្រយោជន៍នោះ ដើម្បីបន្តដំណើររឿងរបស់ខ្លួន។

អនុរដ្ឋមន្ត្រីការបរទេសរុស្ស៊ីលោក Mikhail Galuzin បានជួបជាមួយតំណាងពិសេសរបស់ចិនសម្រាប់កិច្ចការអឺរ៉ាស៊ី លោក Li Hui នៅទីក្រុងមូស្គូ កាលពីថ្ងៃទី២ ខែមីនា នេះបើយោងតាមក្រសួងការបរទេស            រុស្ស៊ី។ 

រដ្ឋមន្ត្រីការបរទេសទួរគីលោក Hakan Fidan បានជួបជាមួយរដ្ឋមន្ត្រីការបរទេសរុស្ស៊ីលោក Sergei Lavrov នៅវេទិកាការទូតនៅទីក្រុងអានតាល់យ៉ា(Antalya) ក្នុងប្រទេសទួរគីកាលពីថ្ងៃទី១ ខែមីនា។ លោក Fidan កាលពីថ្ងៃទី៣ ខែមីនា បានអំពាវនាវឲ្យមានការពិភាក្សាអំពីបទឈប់បាញ់ ចាប់ផ្តើម ដោយនិយាយថា៖«វាដល់ពេលត្រូវចាប់ផ្តើមការពិភាក្សាហើយ»។

https://x.com/kyivindependent/status/1764522189871608141?s=46